Buxoro viloyati hokimligi

Marosimda soʻz olgan viloyat hokimi mamlakatimizda soʻnggi yillarda Prezidentimiz Shavkat Mirziyoyev rahbarligida amalga oshirilayotgan keng koʻlamli islohotlar natijasida Favqulodda vaziyatlar vazirligi tizimi ham xalqimizga yaqin va ishonchli tuzilmaga aylanib borayotganini eʼtirof etdi. 

Taʼkidlanganidek, qabul qilinayotgan Farmon va qarorlar sohada samarali profilaktika va davlat nazoratini amalga oshirishning zamonaviy raqamli yechimlarini joriy qilish imkoniyatini yaratmoqda.  Favqulodda vaziyatlar profilaktikasini tashkil etish boʻyicha mutlaqo yangicha tizim joriy qilinib, mahallada xizmat qiluvchi davlat inspektorlari faoliyati yoʻlga qoʻyildi.

Bu borada, viloyatimizdagi 516 ta mahalla “qizil”, “sariq” va “yashil”  toifalarga ajratilib, xavf yoʻnalishlari belgilandi. Bunday yangicha yondashuv favqulodda vaziyatlar va yongʻinlarning oqibatlari bilan emas, balki ularning sabablari bilan kurashishga xizmat qilmoqda. “Qizil” va “sariq” toifadagi mahallalarda muntazam ravishda oʻtkazilgan “xonadonbay” oʻrganishlar samarasida joriy yilning 6 oyi davomida yongʻinlar oʻtgan yilning mos davriga nisbatan 53 taga kamayishiga erishildi.

Tizim infratuzilmasini yaxshilash va zamonaviy texnika vositalari bilan taʼminlash borasida ham qator ishlar amalga oshirildi. Viloyat favqulodda vaziyatlar boshqarmasi va tarkibiy boʻlinmalari moddiy-texnika bazasini mustahkamlash maqsadida joriy yilda respublika va mahalliy byudjet hisobidan 3 mlrd. soʻmdan ortiq mablagʻlar yoʻnaltirildi. 

— Shu bilan bir qatorda, xalqimizni, iqtisodiyotimiz va xalq xoʻjaligi tarmoqlarini favqulodda vaziyatlardan, yongʻinlar va boshqa talofatlardan ishonchli himoya qilish borasida hali bir qator ishlarni amalga oshirishimiz lozim.  Birinchi navbatda, favqulodda vaziyatlar boʻlinmalarini eng zamonaviy maxsus texnikalar va vositalar bilan jihozlash, xodimlarning malaka va mahoratini oshirish, qutqaruv xizmatlarining doimiy shayligini  taʼminlash borasida ishlarni tizimli ravishda amalga oshirishimiz darkor.  Favqulodda vaziyatlar boshqarmasi hisobida mavjud boʻlgan 146 ta avtotransport vositalari mavjud boʻlib, zamon talabidan kelib chiqqan holda uni yangilab borishimiz lozim,-dedi Botir Zaripov.

Soʻngi yillarda Buxoroda koʻplab yirik  bino va inshootlar, sanoat va ishlab chiqarish korxonalari, ijtimoiy majmualar barpo etilmoqda. Moddiy va maʼnaviy qiymati bebaho boʻlgan madaniy meros obyektlarimizga minglab xorijlik va mahalliy sayyohlar tashrifi kun sayin ortib bormoqda. Bunday oʻzgarishlar favqulodda vaziyatlarning oldini olishning eng samarali va tezkor mexanizmlarini hayotga tatbiq etishni taqozo etadi.  

Viloyat boshqarmasi tasarrufidagi yaroqsiz holatga kelib qolgan texnikalar oʻrniga 18 ta zamonaviy maxsus va yengil avtotransport vositalarining ajratilganligi davlatimiz rahbari va hukumatimizning yuqoridagi masalalarga qaratayotgan alohida eʼtibori namunasidir.
Oʻz navbatida bu tizim xodimlarining faoliyati samaradorligini yanada oshirishga xizmat qiladi.

Tadbirda soʻzga chiqqan soha faxriylari va yoshlar berilayotgan eʼtibor va ragʻbat uchun oʻz minnatdorliklarini bildirishdi. 

Shundan soʻng  shaxsiy tarkibga zamonaviy maxsus hamda yengil xizmat avtomashinalari kalitlari tantanali tarzda topshirildi.

Viloyat hokimligi matbuot xizmati