Buxoro viloyati hokimligi

Mazkur tadbir jamoat xavfsizligini mustahkamlash, huquqbuzarlik va jinoyatchilikning oldini olish, aholi osoyishtaligini taʼminlash hamda fuqarolar oʻrtasida qonunga hurmat tuygʻusini yanada kuchaytirishga qaratilgan.

Oylik munosabati bilan Buxoroda tungi yoʻriqnoma oʻtkazildi.

Soʻzga chiqqanlar tomonidan taʼkidlanganidek, oylik doirasidagi tadbirlarni yuqori saviyada tashkil qilish maqsadida viloyat, tuman va shaharlarda shtablar faoliyati yoʻlga qoʻyildi.

Oylik doirasida 1-6-iyul kunlari davomida olib borilgan tadbirlar natijasida qotillik, bezorilik, bosqinchilik, avtomashina olib qochish kabi oʻta ogʻir jinoyatlar sodir etilishiga yoʻl qoʻyilmaganligi, qidiruvda yurgan 12 nafar shaxslar ushlanib, 10 nafar bedarak yoʻqolganlar topilganligi, albatta, ijobiy natijadir.

Giyohvandlikka qarshi kurashish yoʻnalishidagi tezkor tadbirlar mobaynida 2 kgga yaqin giyohvandlik, 22 594 dona psixotrop dori vositalarining isteʼmolga kirib kelishi oldi olinganligi, 118 tup giyohvandlik oʻsimligi aniqlanganligi bu boradagi vazifalarimiz koʻlami kengligini yaqqol koʻrsatmoqda.

Hamkorlikdagi sayʼ-harakatlar natijasida 117 ta jinoiy va 823 ta maʼmuriy holatlarning oldi olinib, 22 ta kiberjinoyat fosh etildi.Tibbiyot muassasalari hisobida turgan 600 nafarga yaqin shaxslar davolash muassasalariga, muayyan yashash joyiga ega boʻlmagan 15 nafar shaxslar Reabilitatsiya markaziga joylashtirildi.Bundan tashqari, probatsiya hisobida turgan 4 700 nafardan ortiq shaxslar bilan tizimli ishlar olib borilmoqda.

Ijtimoiy profilaktika obyekti hisoblangan 2 981 nafar shaxsga berilgan xulosalar asosida ularning muammolari hal etilganligi ham birgalikdagi ishlarning samarasidir.

Umuman olganda, oylik doirasida viloyatda xavfsiz muhitni yaratish va kriminogen vaziyatni barqarorlashtirish borasidagi ishlar 1-avgustga qadar tizimli ravishda, izchillik bilan davom ettirilishi lozimligi qayd etildi. 

Shuningdek, yoʻriqnomada, oylik doirasida belgilangan vazifalardan kelib chiqib, viloyatimizning har bir mahallasida xavfsiz va sogʻlom muhitni taʼminlashga qaratilgan tadbirlarni uyushqoqlik bilan oʻtkazish uchun zarur koʻrsatmalar berildi.

Avvalambor, huquq tartibot idoralari, mutasaddi tashkilotlar, “mahalla yettiligi” vakillari uyma-uy yurgan holda, kriminogen vaziyatga salbiy taʼsir koʻrsatishi mumkin boʻlgan har bir omilni aniqlashi hamda zudlik bilan bartaraf etishi zarurligi taʼkidlandi. 
Shu bilan birga, alohida toifadagi shaxslar bilan manzilli profilaktik tadbirlarni davom ettirib, ishsiz fuqarolar, ayniqsa, xotin-qizlar va yoshlarning bandligini taʼminlash, oilaviy nizolarni bartaraf etish, “Ijtimoiy profilaktika” obyekti boʻlgan fuqarolar muammolarini hal qilishga “alohida ustuvor vazifa” sifatida eʼtibor qaratish lozimligi aytildi. 

Jinoyat sodir etilishining oldini olishga qaratilgan ishlar har bir oila, koʻcha va mahallani, muassasalarni qamrab olishi, bu boradagi tashkilotchilik, jonkuyarlik, fidoyilik barcha boʻgʻindagi rahbarlarning, huquqni muhofaza qiluvchi organlar xodimlarining kundalik ish tarziga aylanishi kerakligi boʻyicha vazifalar belgilandi.

Tadbirda ichki ishlar vazirining birinchi oʻrinbosari — Tezkor-qidiruv departamenti boshligʻi Botir Qudratxoʻjayev, viloyat hokimi Botir Zaripov ishtirok etdi. 

Viloyat hokimligi matbuot xizmati