Buxoro viloyati hokimligi

Korxona oʻn yildan ortiq vaqt davomida Oʻzbekiston energetika bozorida faoliyat yuritib kelmoqda hamda Xitoy va Oʻzbekiston oʻrtasidagi energetika sohasidagi hamkorlikda muhim muhandislik pudratchisi sifatida ishtirok etmoqda. 

Korxona "Oʻzbekneftgaz" AJ bilan yaqin hamkorlikda Buxoro neftni qayta ishlash zavodini modernizatsiya qilish,  Qandim konining umumiy uzunligi 410 kilometr boʻlgan gaz quvuri, 53 ta quduq punkti va 24 ta kompleks texnologik stansiyasidagi gaz yigʻish tarmogʻI qurish, Buxoro viloyatidagi gaz-kondensat konlarining yer usti infratuzilmasini barpo etish, "Markaziy Osiyo – Xitoy" magistral gaz quvurining Oʻzbekiston hududidagi yordamchi stansiyalari va kompressor obyektlarini qurish va rivojlantirish loyihalarida qatnashgan.

China Petroleum Engineering & Construction Corporation (CPECC) endilikda  “Buxoro sanoatni rivojlantirish kompleksi” maxsus sanoat parkida neftni qayta ishlash zavodlari hamda neft-kimyo majmualarini modernizatsiya qilish,  yoqilgʻi mahsulotlari sifatini yaxshilash uchun zarur boʻladigan uskunalarni yiʻgʻishni yoʻlga qoʻymoqchi. 

Viloyat hokimi Botir Zaripov va kompaniyaning Oʻzbekistondagi koordinatori Fang Zi You oʻrtasida kechgan muloqotda loyihani amalga oshirish bilan bogʻliq masalalar keng muhokama qilindi.

Viloyat hokimi davlatimiz rahbarining ochiqlik siyosati tufayli Buxoroda ham investorlar uchun qulay biznes muhiti yaratilgani, xorijiy sarmoyadorlarni qoʻllab-quvvatlash boʻyicha zarur shart-sharoitlar mavjudligini alohida taʼkidladi.

 Koʻzda tutilgan loyihani hayotga tatbiq etish uchun har tomonlama koʻmak berishga tayyor ekanligini bildirdi. Shuningdek, “Buxoro sanoatni rivojlantirish kompleksi” maxsus sanoat parkida investorlar uchun yaratilgan imkoniyat va imtiyozlar haqida maʼlumot berildi. 

 Uchrashuvda loyihani tayyorlash hamda muzokaralarni davom ettirishga kelishib olindi.

Viloyat hokimligi matbuot xizmati