Shofirkon: Savrak qishlog‘ida tadbirkor Baxtiyor Aslonov tikuvchilik sexini rivojlantirmoqda
2026-07-04 16:25:00 / Yangiliklar
Bir mahalla yoki ko‘chada birgina tikuv shaxobchasi yoxud chevarlik sexi ish yuritishi o‘sha hudud aholisi uchun ham zo‘r qulaylik, shinam sharoit va bir nechta oila uchun daromad manbai degani. Bugun “Jo‘sho‘ra” mahalla fuqarolar yig‘inidagi Savrak qishlog‘i ham har jihatdan obod va ko‘rkam hududlar sirasiga kirib, endilikda qishloqda tikuv sexi ham faoliyat yuritayotgani yuqoridagi fikrimiz dalili.
Mahalliy tadbirkorlardan biri Baxtiyor Aslonov tashabbusi bilan tashkil etilgan tikuvchilik kichik korxonasi hududda xotin-qizlar bandligini ta’minlash, ularni kasb-hunarli qilib, oilalar daromadini oshirishda samarali loyihalardan biri bo‘ldi. Ayni kunda chevarlar sexida ayollar kiyim-kechagi, kelinchaklar liboslari talabga muvofiq bejirim tikib tayyorlanmoqda.
Bugunga kelib kichik korxonada 13 nafar tikuvchi xotin-qiz doimiy ish bilan ta’minlangan bo‘lib, ular zamonaviy tikuv mashinalarida mehnat qilishmoqda. Holbuki, bu chevarlarning aksariyati yaqin-yaqingacha ishsiz va daromadsiz uy bekalari bo‘lishgani ham rost. Tikuvchilarga oyiga o‘rtacha 2,5-3 million so‘m atrofida oylik maosh tayinlangan bo‘lib, ular qo‘li bilan kuniga o‘rtacha 10 dona tayyor mahsulot ishlab chiqarilib, buyurtmalar asosida mijozlarga yetkazib berilmoqda.
Ishlab chiqarish hajmi va mahsulotlarga bo‘lgan talabning ortib borayotgani samarasi o‘laroq, korxona tomonidan kunlik o‘rtacha 10–12 million so‘m miqdorida daromadga erishilmoqda. Kichik korxona ish yurituvchisi Shahlo Jalolova tikuv jarayonini muvofiqlashtirish, buyurtmalar bilan ishlash, tayyor mahsulotni egalariga yetkazish kabi tashkiliy ishlarda band. Muhimi, sex ishi barqaror, tikuvchilar qo‘li bekor qolmasdan, kunlik mahsuldorlikka erishmoqdalar.
Sex egasi, tadbirkor Baxtiyor Aslonov esa bu kabi tashkiliy ishlarda o‘zi bosh-qosh. U kichik korxona ishini rivojlantirish, xom ashyo va buyurtmalar sonini ko‘paytirib, qo‘li ostidagi tikuvchilari jamoasi moddiy manfaatdorligini oshirish harakatida. Bu borada ayni paytda mahalla ma’muriyati va tuman hokimligi mas’ul mutasadddilari bilan yaqin hamkorlikda ish olib borilmoqda. Garchi chekka hududda bo‘lishiga qaramasdan, sexda pishiq-puxta tikib tayyorlanayotgan liboslarni nafaqat ichki bozorda sotish, balki eksportga yo‘naltirish, hatto qo‘shni Turkmaniston bozoridan o‘ziga munosib o‘rin egallash borasida jiddiy bosh qotirilmoqda.
Viloyat hokimligi matbuot xizmati