Buxoro tumani: Xo‘jarabot qishlog‘ida zamonaviy maktabgacha ta’lim tashkiloti ochildi
2026-07-01 11:15:00 / Yangiliklar
Mahalla aholisi, yosh oilalar bog‘cha yoshidagi bolalarini uzoq hududlardagi maskanlarga joylashga yoki ular bilan birga qatnashga majbur edilar. Endilikda ularning ko‘p yillik orzusi ushalib, bolajonlar uchun barcha qulayliklarga ega zamonaviy ta’lim maskani o‘z faoliyatini boshladi.
Ayni kunda uch mingga yaqin aholi istiqomat qilayotgan Xo‘jarabot qishlog‘ida faoliyat yuritayotgan Bolalar va o‘smirlar sport maktabining ko‘p yildirki, foydalanilmay kelgan eski binosi mukammal ta’mirlanib, uning negizida 30-sonli davlat maktabgacha ta’lim tashkiloti foydalanishga topshirildi.
Davlat muassasasi qurilish-ta’mirlash ishlari uchun mahalliy byudjet mablag‘i hisobidan 1 milliard 300 million so‘m ssuda mablag‘i yo‘naltirildi. Bugunga kelib hududda 90 o‘rinli zamonaviy maktabgacha ta’lim maskani barpo etildi.
Bolalar bog‘chasida yorug‘ va shinam guruh xonalari shay qilinib, ertamiz egalari uchun mashg‘ulot va dam olish xonalari, oshxona va yotoqxona, o‘yin maydonchalari, sanitariya tarmog‘igacha talab darajasida jihozlangan, navqiron avlod vakillari sifatli ta’lim-tarbiya olishlari uchun zarur shart-sharoit yaratilgan. Bu yerda o‘nga yaqin malakali pedagog-tarbiyachi bolajonlarni talab darajasida tarbiyalash uchun jalb qilingan.
Yangi tashkil etilgan 30-sonli davlat maktabgacha ta’lim tashkiloti kelajak egalarining bilimli, sog‘lom va barkamol bo‘lib voyaga yetishida muhim o‘rin tutadi. Muassasa ochilishida tuman hokimligi, maktabgacha va maktab ta’limi bo‘limi mas’ullari, jamoatchilik vakillari, quruvchi va ota-onalar hozir bo‘ldilar.
Tadbirda so‘zga chiqqanlar so‘nggi yillarda xo‘jarabotliklar turmush darajasi yaxshilanib borayotgani, har jabhada yangilanish va rivojlanish ro‘y berayotganidan mamnunliklarini bildirishib, yangi andozadagi bolalar bog‘chasi ota-onalar tashvishini aritgani, albatta, bunda tarbiyalangan bolajonlar erta savod chiqarib, maktab ostonasiga tayyor bo‘lishlarini ta’kidladilar.
Muassasa ramziy lentasi qirqilgach, tadbirda yig‘ilganlar inshootda yaratilgan qulayliklar bilan yaqindan tanishdilar.
Viloyat hokimligi matbuot xizmati