Buxoro viloyati hokimligi

Kuni kecha Romitan tumani Mudofaa bo‘limi ma’muriy binosini foydalanishga topshirish marosimi bo‘lib o‘tdi. Tadbirda tuman hokimligi mas’ullari, Janubiy-G‘arbiy maxsus harbiy okrug qo‘shinlar qo‘mondoni, polkovnik A. Tursunov, mehnat faxriylari, harbiy xizmatchilar, jamoatchilik vakillari ishtirok etdilar.
 

Ta’kidlash joizki, bunga qadar tumanning mudofaa ishlari bo‘limi binosi ta’mirtalab holatda, ish yuritish moddiy-texnik jihatdan moslashtirilgan sharoitda edi. Buxoro viloyati harbiy-ma’muriy sektori tomonidan ajratilgan 820 million so‘m pul mablag‘i hisobidan tuman mudofaa ishlari bo‘limining infratuzilmasi yaxshilandi.
 

Zamonaviy dizayn asosida qurilgan va aholiga xizmat ko‘rsatish uchun barcha qulayliklarga ega bo‘lgan ushbu binoda navbatchilikni o‘tash uchun xona, boshqaruv punkti, arxiv, jismoniy va yuridik shaxslarni qabul qilish uchun maxsus joy hamda xizmat xonalaridan iborat jami 27 ta xona mebel, kompyuter jamlanmalari va boshqa zarur buyumlar bilan jihozlandi. 
 

Tadbir ishtirokchilari binoda yaratilgan qulayliklar bilan yaqindan tanishdilar. Ta’kidlanganidek, yoshlarning armiya, harbiy-vatanparvarlik tarbiya haqidagi ilk taassurotlari aynan Mudofaa ishlari bo‘limlarida shakllanadi.
 

Tumanda olib borilayotgan bunyodkorlik ishlariga hamohang tarzda “Armiya ostonasi” deya e’tirof etiladigan barcha qulayliklarga ega Mudofaa ishlari bo‘limining yangi qiyofasi ham endilikda Qurolli Kuchlar safida xizmat qilishga otlangan yoshlarni harbiylikka tayyorlash va saralash kabi vazifalardan tashqari, ularda vatanparvarlik, sadoqat va jasorat kabi tuyg‘ularni ham shakllantiradigan  maskanga aylanadi.
 

Tadbirda hozir bo‘lganlar uchun harbiy orkestr va faxriy qorovul tomonidan harbiy chiqishlar namoyish qilindi.