Buxoro viloyati hokimligi

Videokonferensiyaaloqa tarzida tashkil etilgan yigʻilishda bu borada amalga oshirilgan ishlar tahliliy-tanqidiy ruhda muhokama qilinib, sohada yoʻl qoʻyilgan kamchiliklar va mavjud muammolar atroflicha koʻrib chiqildi. Shuningdek, kriminogen vaziyatni barqarorlashtirish, huquqbuzarlik va jinoyatlarning oldini olish, mahallalarda xavfsiz muhitni taʼminlash boʻyicha masʼul rahbarlar va mutasaddilarning hisobotlari tinglandi.

Taʼkidlanganidek, soʻnggi yillarda jinoyatchilikni oldini olish, jilovlash va unga qarshi kurashish masalasi nafaqat huquqni muhofaza qilish idoralari, balki hokimiyat va keng jamoatchilikning asosiy ustuvor vazifalaridan biriga aylangan. Hududda sodir boʻlayotgan har qanday koʻrinishdagi jinoyatning kelib chiqishiga sabab boʻlgan omillar tekshiruv yoki tergov jarayonida oʻrganilmoqda. Belgilangan tartibda muhokama etilib, tegishli chora qoʻllanmoqda. Lekin davlat siyosati darajasida yaratilayotgan sharoit va imkoniyatlar qaramasdan, jinoyatchilikka qarshi kurashish borasidagi ishlar samarali, deb boʻlmaydi.

Joriy yilning 27-yanvarida muhtaram Prezidentimiz raisligida oʻtkazilgan yigʻilishda jinoyatchilikka qarshi kurashishning asosiy yoʻnalishlari sifatida uyushgan jinoyatchilik, narkojinoyat, kiberjinoyat va yashirin iqtisodiyotga qarshi kurashish vazifalari belgilab berildi.

Shuningdek, yoshlar oʻrtasida huquqbuzarliklarning oldini olish, oilaviy nizolarni bartaraf etish, aholining huquqiy ongini oshirish hamda davlat organlari oʻrtasidagi hamkorlikni kuchaytirish zarurligi taʼkidlandi. Qabul qilingan qarorlar asosida mahallalarda xavfsiz muhitni shakllantirishning yangi mexanizmlari joriy etildi. Mazkur vazifalar ijrosini taʼminlash, jinoyatchilikni jilovlash va aholi xavfsizligini mustahkamlash borasida viloyatda tizimli ishlar amalga oshirilayotgan boʻlsada, ayrim soha va hududlarda qaror va Dasturlar ijrosiga yetarlicha eʼtibor qaratilmayotganligi, berilayotgan topshiriqlar ijrosi oʻz holiga tashlab qoʻyilganligi natijasida kriminogen vaziyat yomonlashmoqda.

Mahallalarda jinoyatdan holi muhitni yaratish va kriminogen vaziyatni barqarorlashtirish borasidagi profilaktik tadbirlar barcha hududlarda ham tizimli tashkil etilmagan.

Davlatimiz Rahbari tomonidan ilgari surilgan “Inson qadri uchun” ustuvor tamoyili hamda raqamlashtirish boʻyicha belgilangan davlat siyosati va strategik islohotlar ijrosi doirasida Mirzo Ulugʻbek tumanida mutlaqo yangi formatdagi — “Aqlli tuman” vaziyatlar markazi barpo etildi.

Bu jinoyatchilik bilan bogʻliq tizim emas, koʻpchilik rahbarlar buni Ichki ishlar organlarining situatsion markazi deb tushunishmoqda. Mazkur tizim tuman hokimligi, vazirlik va idoralar, kommunal xizmatlar, xavfsizlik, ijtimoiy soha, iqtisodiyot, qurilish, ekologiya hamda aholi murojaatlari boʻyicha maʼlumotlarni yagona raqamli maydonda jamlashga qaratilgan. Natijada hududdagi real vaziyatni tuman, mahalla, obyekt va xizmatlar kesimida koʻrish, tahlil qilish va masʼul tashkilotlar kesimida ijroni nazorat qilish imkoniyati yaratildi.

“Aqlli tuman” vaziyatlar markazi — bu oddiy dashbord emas, balki maʼlumotlarni qabul qilish, tekshirish, vizuallashtirish, sunʼiy intellekt yordamida tahlil qilish, muammoli holatlarni aniqlash va ular boʻyicha tezkor boshqaruv qarorlarini shakllantirishga xizmat qiluvchi integratsiyalashgan axborot-tahlil platformasidir.

Har bir shahar-tumandagi kriminogen vaziyatdan kelib chiqqan holda byudjet mablagʻlarini iqtisod qilish maqsadida kam hajmli “Situatsion tahlil markazi”ni tashkil etish tavsiya qilish boʻyicha Ichki ishlar vazirligining takliflari ishlab chiqilgan. 

Hududlarni raqamli boshqarishga oʻtishni kechiktirish boshqaruv samaradorligining pasayishiga, resurslarning maqsadsiz sarflanishiga va aholi muammolarini hal etishdagi sustkashlikka olib kelishi mumkin.

Muhokamalar yakunida aniqlangan kamchiliklarni bartaraf etish, profilaktik tadbirlar samaradorligini oshirish hamda qarorlar ijrosini soʻzsiz taʼminlash yuzasidan mutasaddilarga topshiriq va vazifalar belgilab berildi.

Viloyat hokimligi matbuot xizmati