Buxoro shahri: Amir Temur mahallasidagi “Yoshlar markazi” — ta’lim, innovatsiya va kreativ muhit uyg‘unligi samarasi
2026-06-15 16:05:00 / Yangiliklar
Buxoro shahrida yoshlarning intellektual salohiyatini oshirish, zamonaviy kasb-hunar va innovatsion ko‘nikmalarini shakllantirish maqsadida barpo etilgan “Yoshlar markazi” ma’muriy inshooti ayni kunda hududdagi ilg‘or ma’naviy-ma’rifiy hamda ta’lim platformalaridan biri sifatida faoliyat yuritmoqda.
Mazkur markaz viloyat markazining Amir Temur mahallasida joylashgan bo‘lib, loyiha umumiy qiymati 2 milliard so‘mni tashkil etadi. Shundan 1,3 milliard so‘m tashabbusli budjet mablag‘i asosida, 700 million so‘m esa “Yoshlar daftari” jamg‘armasi mablag‘i hisobidan moliyalashtirilgan. Bu loyiha yoshlarni zamonaviy bilim va kasblarga yo‘naltirish hamda bo‘sh vaqtini mazmunli tashkil etish borasida muhim qadam bo‘ldi.
Mazkur uch qavatli, 360 kvadrat metr maydonga ega markazda 8 ta zamonaviy, innovatsion o‘quv faoliyat xonalari tashkil etilgan. Markazda axborot texnologiyalari, sun’iy intellekt asoslari, shaxmat, xorijiy tillar, media va kontent yaratish markazi, volontyorlik faoliyati, book cafe, qizlar akademiyasi hamda “Ustoz IT” loyihalari doirasida turli o‘quv kurslari va amaliy mashg‘ulotlar olib borilmoqda.
Markaz faoliyati doirasida yoshlarning raqamli savodxonligini oshirish, kreativ fikrlashini rivojlantirish, liderlik kompetensiyalarini shakllantirish va zamonaviy mehnat bozori talablariga mos mutaxassislarni tayyorlashga alohida e’tibor qaratilgan.
Hozirda markaz tomonidan 15 ming nafarga yaqin yosh yigit-qiz qamrab olingan markaz nafaqat ta’lim-tarbiya maskani, balki iqtisodiy samaradorlikni ta’minlovchi innovatsion infratuzilma sifatida ham faoliyat yuritmoqda. Xususan, binoga o‘rnatilgan, quvvati 45 kVt soat bo‘lgan quyosh panellari orqali “yashil energetika” tamoyillari amaliyotga joriy etilib, yiliga qariyb 72 million so‘m atrofida iqtisodiy samaradorlikka erishilmoqda. Bino ijarasi hisobidan yiliga 180 million so‘m daromad shakllanayotgani markazning moliyaviy barqarorligini ta’minlashga xizmat qilmoqda.
Viloyat markazidagi “Yoshlar markazi” bu zamonaviy ta’lim, innovatsiya, kreativ muhit va yoshlar tashabbuslarini qo‘llab-quvvatlashni o‘zida mujassam etgan yangi avlod maskanidir. Mazkur markaz yoshlarning bilim olishi, o‘z ustida ishlashi, startap va innovatsion g‘oyalarini rivojlantirishi hamda kelajak liderlari sifatida shakllanishi uchun mustahkam platforma vazifasini bajaradi.
Viloyat hokimligi matbuot xizmati