Buxoro viloyati hokimligi

Dastlabki manzili milliy liboslar va hunarmandchilik mahsulotlari ishlab chiqarishga ixtisoslashgan “Ezaza group” mas’uliyati cheklangan jamiyati bo‘ldi. Korxonada chevarlar qo‘li bilan milliy liboslar, zardo‘zlik to‘nlari, kelin-kuyovlar sarpolari, kashtachilik va suvenir mahsulotlari tayyorlanmoqda. Xotin-qizlarni qo‘llab-quvvatlash va ularni doimiy daromad manbai bilan ta’minlashda faol bo‘lgan fabrikada bugunga kelib 30 nafar chevar mehnat faoliyatini yuritmoqda. Bundan tashqari, yana 25 nafar tikuvchi uy sharoitida kasanachi sifatida korxona bilan shartnoma asosida hamkorlik qilib, mahsulot hajmini oshirishda o‘z hissasini qo‘shmoqda. 

“Ezaza group” ayni kunda yirik ishlab chiqarish salohiyatiga ega sub’ektlardan biri bo‘lib, bunda bir oyda 400 million so‘mgacha bo‘lgan qiymatdagi mahsulot tayyorlanib, buyurtmachilarga yetkazilmoqda. 

Kunlik quvvatiga kelsak, bu korxonada bir kunda 400-500 donagacha kelin-kuyovlar zardo‘z choponlari, maxsus logotiplar, kashtalar, bosh kiyimlar va zardevorlar tikib tayyorlanmoqda. 

Zamonaviy yengil sanoat texnologiyasi va ish uslubini o‘zida o‘zlashtirayotgan “Ezaza group” MChJ faoliyati davomida Tojikiston va Qozog‘iston davlatlariga 100 ming AQSh dollariga teng mahsulotni eksport qilishga erishdi. Shuningdek, korxona brendiga xos mahsulotlar Qozog‘iston, Qirg‘iziston, Tojikiston, Rossiya, Ozarbayjon, Xitoy va Tailand kabi davlatlarda o‘tkazilgan xalqaro nufuzli moda namoyishlarida o‘zining milliy liboslar kolleksiyasi bilan muntazam qatnashib, munosib e’tirofini topib kelmoqda.

Shundan so‘ng, Bosh vazirning o‘rinbosari Zulayxo Mahkamova “Merganteks” paxta-to‘qimachilik klasteri tarkibidagi “Nigora” fabrikasida bo‘ldi.       

Umumiy qiymati 35 million AQSh dollarini tashkil etuvchi ushbu yirik loyiha doirasida paxta xom ashyosini chuqur qayta ishlashdan tortib, tayyor mato va kiyim-kechak ishlab chiqarishgacha bo‘lgan to‘liq va uzluksiz zanjir (klaster tizimi) yo‘lga qo‘yilgan. Ahamiyatlisi, hozirda fabrikada 840 ta yangi ish o‘rni yaratilgan.

“Nigora” fabrikasi Xitoy, Germaniya va Belgiyadan keltirilgan, xalqaro standartlarga to‘liq javob beradigan zamonaviy, yuqori texnologik uskunalar bilan jihozlangan. Yengil sanoat sub’ektida “Shoyigul” savdo yorlig‘i ostida ishlab chiqarilayotgan tikuv-trikotaj, tayyor kiyim mahsulotlari asosan Yevropa Ittifoqi bozoriga, xususan, Italiya, Avstriya, Buyuk Britaniya, Germaniya davlatlariga eksport qilinayotgani katta yutuq, albatta. Bu jarayonda yillik eksport hajmi 10 million AQSh dollarini tashkil etmoqda. 

Oila va xotin-qizlar qo‘mitasi raisi Zulayxo Mahkamova boshchiligidagi mehmonlar korxonaning shou-rumi va tayyor mahsulotlar ko‘rgazmasi bilan tanishdilar. Fabrika mahsulotlarining yuqori sifati mazkur tadbirda ishtirok etgan Tojikiston delegasiyasi vakillari tomonidan ham e’tirof etildi va yuqori baholandi.

Viloyat hokimligi matbuot xizmati