Buxoro viloyati hokimligi

Bugungi tadbirlar yoshlarimizni vatanparvarlik, jasorat, intizom va sogʻlom turmush tarzi ruhida tarbiyalashga xizmat qilayotgan muhim loyihalardan biri ekanligi eʼtirof etildi. 

Qayd etilganidek, bugun minglab yoshlarimiz sport orqali nafaqat jismonan chiniqmoqda, balki hayotda oʻz oldiga aniq maqsad qoʻyib, unga intilishni ham oʻrganmoqda.

“Shijoat va gʻayrat” harbiy-sport musobaqalari hamda Davlat xavfsizlik xizmati kubogi musobaqalari yoshlarimizning jismoniy tayyorgarligini oshirish, ularda vatanparvarlik tuygʻularini mustahkamlash va iqtidorli sportchilarni kashf etishda muhim ahamiyat kasb etmoqda.

Tadbir doirasida “Shijoat va gʻayrat” harbiy-sport musobaqasining viloyat bosqichi gʻoliblari va nominatsiyalar boʻyicha turli yoʻnalishlarda faol boʻlgan yoshlar tantanali tarzda taqdirlandi. 

Taʼkidlash lozimki, musobaqaning mamlakat bosqichida eng yuqori natijaga erishgan jamoa aʼzolari oliy harbiy va harbiylashtirilgan oliy taʼlim muassasalariga kirish uchun tavsiyanomaga egalik qiladi. Shuningdek, finalda birinchi oʻrinni egallagan jamoa mahallasiga namunaviy universal sport maydonchasi, ikkinchi oʻrin sohibi mahallasiga strit-vorkaut maydonchasi, uchinchi oʻrin sohibiga esa vorkaut maydonchasi qurib beriladi.

Xabaringiz bor, 2021-yildan boshlab Oʻzbekistonda yoshlar oʻrtasida futbol va mini-futbol boʻyicha Davlat xavfsizlik xizmati kubogi musobaqalari oʻtkazilib kelinmoqda.

Anʼanaga koʻra, joriy yilda ham Qoraqalpogʻiston Respublikasi, viloyatlar va Toshkent shahrida oʻgʻil bolalar oʻrtasida futbol va mini-futbol hamda qizlar oʻrtasida mini-futbol boʻyicha DXX kubogi musobaqalari uch bosqichda oʻtkazilmoqda.

Tadbir davomida yoshlar oʻrtasida futbol, mini-futbol va qizlar futboli boʻyicha Davlat xavfsizlik xizmati kubogi musobaqasining viloyat bosqichiga kurʼa tashlandi. 

Viloyat hokimligi matbuot xizmati