Buxoro viloyati hokimligi

Mazkur dastur doirasida Shofirkon tumanida ta’lim, maktabgacha ta’lim va sog‘liqni saqlash muassasalari infratuzilmasini yaxshilash, ularni zamonaviy talablar asosida rekonstruksiya qilish, energiya tejamkor tizimlar bilan jihozlash maqsadida qariyb 50 milliard so‘m mablag‘ yo‘naltirilmoqda. 

Xuddi shunday, dastur doirasida umumiy qiymati 35 milliard so‘mdan ortiq mablag‘ hisobidan tumandagi qator umumta’lim maktablarida mukammal ta’mirlash ishlarini bajarish ko‘zda tutilgan. Jumladan, Xo‘ja Orif mahallasidagi 1-sonli umumta’lim maktabi, Do‘rmen mahallasidagi 27-sonli umumta’lim maktabi, Talisangobod mahallasidagi 32-sonli umumta’lim maktabi hamda Xorin mahallasidagi 48-sonli umumta’lim maktabini zamonaviy ko‘rinishga keltirish talabi qo‘yilgan. 

Ta’lim muassasalarida amalga oshiriladigan qurilish-ta’mirlash ishlari natijasida o‘quv xonalari, laboratoriyalar, sport zallari va yordamchi binolar yangilanib, o‘quvchilar uchun yanada qulay va xavfsiz ta’lim muhiti yaratiladi. Muhimi, bu loyihalar orqali energiya tejamkor texnologiyalar joriy etilib, binolar issiqlik samaradorligi sezilarli darajada oshiriladi.

Shuningdek, maktabgacha ta’lim tizimini rivojlantirish dasturning ustuvor yo‘nalishlaridan biri hisoblanadi. Ayni kunda hududdagi maktabgacha ta’lim tashkilotlarini rekonstruksiya qilish uchun qiymati 11 milliard 100 million so‘m mablag‘ ajratilgan. Masalan, bu sarmoya hisobidan Sultonobod mahallasidagi 18-sonli, Shodlik mahallasidagi 19-sonli hamda Nurafshon mahallasidagi 30-sonli maktabgacha ta’lim tashkilotlarida mukammal ta’mirlash ishlari amalga oshiriladi.

Bu loyihalar natijasida bolajonlar uchun zamonaviy, qulay va xavfsiz tarbiya shart-sharoiti yaratiladi. Guruh xonalari, oshxonalar, yotoqxona va o‘yin maydonchalari, sanitariya tarmog‘i yangilanib, energiya tejamkor uskunalar bilan jihozlanadi. Pirovardida esa 270 nafardan ortiq jajji o‘g‘il-qiz uchun zamonaviy talablarga muvofiq muhit yaratiladi. 

Bundan tashqari, aholiga ko‘rsatilayotgan birlamchi tibbiy xizmat sifatini yaxshilash ham mazkur dasturdan o‘rin olgan. Bu jarayonda belgilangan maqsadlar uchun 4 milliard 400 million so‘m mablag‘ yo‘naltirilgan bo‘lib, Jo‘sho‘ra mahallasidagi 43-sonli tibbiy poliklinika va Alisher Navoiy mahallasidagi oilaviy shifokorlik punktida ta’mirlash va rekonstruksiya ishlari bajariladi. 

Tibbiyot muassasalari yangilanishi natijasida aholi uchun tibbiy xizmat ko‘rsatish sifati va qamrovi oshadi. Shuningdek, zamonaviy diagnostika va xizmat ko‘rsatish imkoniyatlari kengayishi natijasida muassasalarga murojaat bilan keladigan aholi vakillarini profilaktik davolash va tashxis qo‘yish ishlari samaradorligi oshiriladi. 

Yuqorida amalga oshiriladigan barcha loyihalar yakuniga yetkazilgach, 2376 nafar o‘quvchi zamonaviy va shinam ta’lim muassasalarida bilim olishi, 270 nafar bolajon yangilangan bog‘chalarda tarbiyalanishi, qolaversa, yuzlab fuqaro yanada sifatli tibbiy xizmatlardan foydalanish imkoniyatiga ega bo‘ladi. 

Bu kabi amalga oshirilayotgan bunyodkorlik ishlari tumanda inson manfaatlarini ta’minlash, yosh avlod uchun munosib ta’lim-tarbiya sharoitlarini yaratish, aholi turmush madaniyatini yanada oshirishga qaratilgani bilan ahamiyatlidir.

Viloyat hokimligi matbuot xizmati