Qorako‘l: ayni pishiqchilikda O‘rinovlar ham tomorqadan kuniga 1 million so‘mgacha daromad olmoqda
2026-06-09 11:30:00 / Yangiliklar
Qishloq joyida yashovchi aholi azaldan tomorqa qilib, sabzavot-poliz mahsulotlari ekib yetishtirib, chorbog‘ida mevali daraxt ko‘chatlarini o‘tqazib yoki tokzor uzumzor barpo etib, har qarich ekin yeridan omilkorlik bilan foydalanishning uddasidan chiqqan. Peshona teri evaziga ekin yerida ishlab, tirikchilik qilayotgan xo‘jaliklarga hamma havas qiladi.
Negaki, ularda dasturxon to‘kinligi barobarida daromad topish, ro‘zg‘orning kam-ko‘stini qoplash, ta’bir joiz bo‘lsa, “yo‘qni yo‘ndirish” tajribasi shakllangan.
Ayni vaqtda esa tomorqadan foydalanish hukumat tomonidan qo‘llab-quvvatlanayotgani, qo‘shimcha imtiyoz sifatida subsidiya va kreditlar ajratilib, oilaviy tadbirkorlik bilan shug‘ullanish istagida bo‘lganlar uchun shart-sharoit yaratilayotgani ayni muddao.
Qorako‘l tumani, Qulonchi mahallasda ham aholi bandligini ta’minlash, daromad manbaini oshirish hamda kambag‘allikni qisqartirish bo‘yicha bir qanchaa ishlar amalga oshirilmoqda. Hududda umumiy qiymati 4 milliard so‘m bo‘lgan 5,5 ming metr masofadagi sug‘orish tarmog‘i o‘zani betonlashtirilgani ayni paytda mahalla aholisini tomorqadan unumli foydalanishiga zamin yaratdi.
Faxriddin O‘rinov ham shu mahallada yashovchi mehnatkash tomorqachilardan biri. Bugun bu xonadon a’zolari tomorqasini obod qilib, ro‘zg‘or va dasturxon to‘kinligini ta’minlamoqda. Erta bahordan 8 sotixli tomorqa yerida bulg‘or qalampiri, baqlajon, pomidor niholllari o‘tqazilib, parvarishlangan. Bugunga kelib jo‘yaklarda hosil pishib yetilmoqda. Kunora tayyor sarxil mahsulot bozorga chiqariloib, kunlik o‘rtacha 1 million so‘mgacha daromadga erishilayotgani halol peshona teri mahsuli, albatta.
— Avvallari tomorqani sug‘orishda qiyinchilikka duch kelardik. Artezian quduq orqali sug‘organimiz bilan baribir, ariqdagi oqar suvdek ahamiyati bo‘lmasdi. Qishlog‘imizdan o‘tgan kanal o‘zanini betonlashtirib berganlarga ming rahmat,—deydi Faxriddin O‘rinov.—Hozirda ekin yerimizni sug‘orishdagi tashvish-muammolar aridi. Suv bo‘lsa, tomorqada hosil serob bo‘ladi. Hosil yaxshi bo‘lsa, ro‘zg‘orga foyda.
Ko‘rinib turibdiki, ekin yerini astoydil obod qilayotgan birgina oilaning orzu-havasi halol mehnat tufayli ro‘yobga chiqmoqda. Zero, intilgan, mehnat qilgan odam uchun qut-baraka harakat, sabr va izlanish bilan keladi.
Viloyat hokimligi matbuot xizmati