Kogon: “Bog‘i Sarayon”da yetilib pishgan shaftoli aholi dasturxoniga tortiq qilinmoqda
2026-06-08 18:30:00 / Yangiliklar
Ayni kunda Kogon tumanida aholi tomorqachilari 21 mingga yaqin bo‘lib, ular tasarrufidagi mavjud tomorqa yeri 2 ming 128 gektarga yetkazilgan. Shuningdek, hududda bevosita issiqxona xo‘jaligini barpo etib, unda yilning to‘rt faslida ham barakali hosil yetishtirayotgan xo‘jaliklar ekin yeri 20 gektardan ortiq maydonni tashkil etmoqda.
Mazkur issiqxonalarning aksariyati 1–4 sotixdan iborat bo‘lib, yil bo‘yi asosan pomidor, kartoshka, piyoz, bodring, karam, sarimsoqpiyoz, qolaversa, limon, apelsin kabi sitrus meva yetishtirilib, xalqimiz dasturxoniga tuhfa etib kelinmoqda.
Shu o‘rinda chog‘roq yeridan katta daromad olayotgan kogonlik ilg‘or tomorqa egalaridan Sorg‘un mahallasida istiqomat qilayotgan Shuhrat To‘raev, O‘baсho‘li mahallasida yashovchi Nosir Haydarov, Bahouddin Naqshband mahallasida yashovchi Bahrom Yodgorov, Sarayon mahallasida yashovchi Said Narziev, Tutkunda mahallasida istiqomat qilayotgan Axtam Fozilovlarni alohida ko‘rsatish mumkin.
Yil bo‘yi astoydil ekin yerida ishlab, kerak bo‘lsa “yo‘qni yo‘ndirib”, pirovardida peshona teri evaziga barakali hosil yetishtirayotgan aholi xonadonlari mirishkorlari bular. Mazkur xo‘jaliklarda yil boshidan kartoshka, pomidor, piyoz, bulg‘or qalampiri, yana boshqa sabzavot-poliz mahsulotlari yetishtirilayotganini ko‘rish mumkin. Ular orasida limon yetishtirishda puxta tajribaga egalari bor.
Hududda samarali faoliyat yuritayotgan dehqon xo‘jaliklaridan biri Sarayon mahallasidagi “Bog‘i Sarayon” mas’uliyati cheklangan jamiyati sanaladi. Mazkur xo‘jalikda 7 gektar maydonda shaftolizor bog‘ barpo qilingan bo‘lib, shaftolining “Big Bon” navi shu kunlarda to‘liq pishib yetilgan. Bog‘da xushxo‘r va xaridorgir hosilni yig‘ib-terib olish ishlari uyushqoqlik bilan olib borilmoqda. Yirikligi, xushbo‘y ta’mi va yuqori sifat ko‘rsatkichi bilan ajralib turgan bu nav sarxil mevalari bozor va savdo rastalari orqali aholi dasturxoniga peshma-pesh yetkazilmoqda.
Aytish joizki, bog‘da yil davomida agrotexnik tadbirlar o‘z vaqtida va sifatli bajarilgani natijasida bugunga kelib hosil mo‘l bo‘lishiga erishildi. Mevani saralash, saqlash, qadoqlash va iste’molchilarga yetkazish jarayoni ham talab darajasida tashkil etilgan. “Bog‘i Sarayon” MChJda yetishtirilgan sifatli va sara shaftoli hosili mehnatkashlar sidqidil peshona teri, halol mehnati mahsuli sifatida bozor to‘kinligiga munosib hissa qo‘shmoqda.
Viloyat hokimligi matbuot xizmati