Olot: mahalla yo‘li ta’mirdan chiqarilib, “D-187” avtomobil yo‘lidagi ko‘prik sozlandi
2026-06-05 15:40:00 / Yangiliklar
Jumladan, “Shayxlar” mahalla fuqarolar yig‘inida qishloq yo‘llarini ta’mirlash, shag‘allashtirish ishlari olib borilmoqda.
Bu loyihalar amaliyotida Romitan tuman yo‘llardan foydalanish davlat muassasasi mexanizatsiyalashgan ishchi-mutaxassislari jonbozlik ko‘rsatmoqdalar. Dastur doirasida Bog‘ qishlog‘i yo‘lining 2 kilometr qismi shag‘allashtirilmoqda. Mazkur ish umumiy loyiha moddiy qiymati 1 milliard 400 million so‘mni tashkil etadi.
Xuddi shunday, Olot tuman yo‘llardan foydalanish davlat muassasasiga qarashli 116-yo‘l bo‘limi ishchi-xodimlari tomonidan hududdagi “D-187” rusumli shaxobcha avtomobil yo‘lining 4-kilometridagi, transport vositalari va piyodalar harakati uchun noqulaylik tug‘dirayotgan ko‘prikda ta’mirlash-tiklash ishlari bajarildi. Negaki, unda keyingi oylarda turli nuqsonlar yuzaga kelgan edi.
Muassasaning maxsus texnikalari va malakali ishchi kuchi jalb etilgan holda, ko‘prikdagi mavjud kamchiliklar qisqa fursatda bartaraf etildi. Jarayonda ko‘prikda harakat xavfsizligini ta’minlash uchun zarur bo‘lgan texnik talablar bajarildi. Yo‘l qoplamasi sozlanib, transport vositalarining xavfsiz harakatlanishi uchun sharoit yaratildi. Albatta, bu yo‘l infratuzilmasining yaxshilanishi aholi va transport vositalari kundalik qatnovi uchun qulaylik yaratish, hudud ijtimoiy-iqtisodiy rivojlanishiga xizmat qiladi.
Viloyat hokimligi matbuot xizmati