Buxoro viloyati hokimligi

Ayni kunda jumladan, G‘ijduvon tumanida ham maktabgacha ta’lim tizimini rivojlantirishga qaratilgan amaliy ishlar izchil bormoqda. Masalan,  shu kunlarda tuman maktabgacha va maktab ta’limi tarmog‘ida amalga oshirilayotgan yirik qurilish-ta’mirlash, jihozlash ishlari qatorida “Qorabog‘” mahalla fuqarolar yig‘inidagi 33-sonli umumta’lim maktabida 420 o‘rinli, “Soktari” mahalla fuqarolar yig‘inidagi 4-sonli umumta’lim maktabida 540 o‘rinli o‘quv binolarini qurib bitkazish va mavjud ta’mirtalab maktablar binolarini zamonaviy andozaga keltirish jarayoni kechmoqda. 

Shu bilan birga, “Sohibiyon” mahalla fuqarolar yig‘inidagi 51-sonli umumta’lim maktabida 624 o‘rinli, “Zarangari” mahalla fuqarolar yig‘inidagi 10-sonli umumta’lim maktabida 870 o‘rinli o‘quv binolarini barpo etish va mavjud o‘quv inshootlarini qayta mukammal ta’mirlash ishlari pudratchi korxonalar ishchi-mutaxassislari tomonidan bajarilmoqda. 

Tuman hokimligi, tegishli mutasaddilar tomonidan har bir mahallada borayotgan qurilish-ta’mirlash ishlari kundalik nazoratga olinib, ularda binokor ishchi-mutaxassislarga yaratilgan mehnat sharoitidan tortib, qurilish materiallari ta’minoti, belgilangan ishlarning muddatida sifatli bajarilayotgani qat’iy nazoratga olingan.  

Xulosa shuki, bugun yangidan qurilayotgan yoki kapital rekonstruksiya qilinayotgan har bir o‘quv binosi bu ertamiz egalarining munosib sharoitda ta’lim-tarbiya olishlari, iste’dodlarini yuzaga chiqarish yo‘lida qo‘yilayotgan mustahkam poydevor, kelajak sari tashlangan ishonchli qadamdir.

Viloyat hokimligi matbuot xizmati