Buxoro tumani: "Ravshan Bukhara Arashan Selection” MCHJ qoʻylar bosh sonini 1000 taga yetkazdi
2026-06-01 20:35:00 / Yangiliklar
Korxona rahbari Rahmonali Hoshimov tomonidan asosiy eʼtibor zotdor qoʻylarni parvarishlash, seleksiya ishlarini rivojlantirish hamda chorva mollarining mahsuldorligini oshirishga qaratilgan. Shu orqali hududda chorvachilik sohasini yangi bosqichga olib chiqish maqsad qilingan.
Mazkur xoʻjalikda “Arashan” zotli qoʻylarni koʻpaytirish ustuvor yoʻnalish sifatida belgilangan boʻlib, kelgusida qoʻylar bosh sonini 3000 boshga yetkazish rejalashtirilgan. Shuningdek, naslchilik ishlarini yanada rivojlantirish maqsadida chetdan yuqori sifatli zotdor qoʻylarni olib kelish, ularni mahalliy iqlim sharoitiga moslashtirish hamda seleksiya jarayonini ilmiy asosda yoʻlga qoʻyish koʻzda tutilgan.
Korxonada chorvachilikni zamonaviy texnologiyalar asosida tashkil etish, yem-xashak bazasini mustahkamlash, veterinariya xizmati va zooveterinariya nazoratini kuchaytirishga alohida eʼtibor berilmoqda. Bu esa nafaqat chorva mollarining sogʻlom oʻsishi, balki mahsuldorlikning oshishiga ham xizmat qilmoqda.
Taʼkidlash joizki, bunday tashabbuslar Buxoro tumanida chorvachilik sohasini barqaror rivojlantirish, ichki bozorni sifatli goʻsht mahsulotlari bilan taʼminlash hamda eksport salohiyatini oshirishga xizmat qiladi.
Viloyat hokimligi matbuot xizmati