Buxoro viloyati hokimligi

Fermer xo‘jaligi tomonidan joriy mavsumda xorijiy seleksiya navlariga mansub bug‘doy ekilib, har gektarga 400 kilogramdan urug‘ sarflangan. Agrotexnik tadbirlarning o‘z vaqtida va sifatli bajarilgani natijasida gektaridan 96 sentnerdan hosil olinib, yuqori natijaga erishildi. Bu esa tumandagi boshqa fermer xo‘jaliklari uchun ham munosib tajriba maktabi bo‘lib xizmat qilmoqda.

Har yilgi dehqonchilik an’anasiga muvofiq, elimiz rizq-ro‘zi manbai bo‘lgan bug‘doy hosilini yetishtirish yo‘lida Qorako‘l tumanida joriy mavsumda g‘allachilikka ixtisoslashgan 225 ta fermer xo‘jaligi tomonidan jami 6035 gektar maydonda sara navli boshoqli don ekinlari parvarishlandi. Mirishkor dehqonlar va fermerlar mehnati tufayli hademay g‘allachilikdan barakali xirmon ko‘tarish maqsad qilingan.              

G‘alla o‘rim-yig‘imini qisqa muddatda va sifatli tashkil etish maqsadida barcha zarur tashkiliy choralar ko‘rilgan. Xususan, mavsum davomida 18 ta zamonaviy, yuqori unumli g‘alla o‘rish kombayni jalb etilmoqda. Mazkur agregatlarni mavsumga texnik jihatdan shay qilish va ta’mirlash maqsadida ular "Merganteks" paxta-to‘qimachilik klasteri texnika parkida jamlanib, mexanik va mexanizatorlar tomonidan texnik ko‘rikdan o‘tkazilgan, nuqson va kamchiliklari bartaraf etilgan.

Shuningdek, 18 ta o‘rim-yig‘im otryadi shakllantirilib, ularga 90 taga yaqin don tashuvchi transport vositasi, 2 ta ko‘chma ta’mirlash ustaxonasi hamda 4 ta yoqilg‘i tashuvchi maxsus avtomashina biriktirilgan.
 
Bugun Qorako‘l dalalarida boshlangan qizg‘in mehnat jarayoni dehqonlarning bir yillik zahmatli mehnati samarasi bo‘lib, tumanda oziq-ovqat xavfsizligini ta’minlash, xalqimiz dasturxonining to‘kinligini yanada mustahkamlashga xizmat qiladi.

Viloyat hokimligi matbuot xizmati