Peshku: “Mustaqillik” mahallasidagi 5-sonli maktabgacha ta’lim maskani mukammal ta’mirlanmoqda
2026-06-01 09:55:00 / Yangiliklar
Joriy yilda 140 ta umumta’lim maktabi va 75 ta maktabgacha ta’lim tashkilotida, jami 215 ta ta’lim muassasasida qurilish-ta’mirlash hamda moddiy-texnik bazani mustahkamlash ishlari amalga oshirilmoqda. Ushbu maqsadlar uchun 1,1 trillion so‘m mablag‘ yo‘naltirilmoqda.
Shu maqsadda jumladan, Peshku tumanida 16 ta inshoot, shundan, 10 ta umumta’lim maktabi va 6 ta maktabgacha ta’lim tashkilotida mukammal ta’mirlash-tiklash va jihozlash ishlari allaqachon boshlangan.
Masalan, tumanning “Mustaqillik” mahalla fuqarolar yig‘inida 180 o‘rinli, 5-sonli maktabgacha ta’lim muassasasida mukammal ta’mirlash ishlari bajarilmoqda. Mazkur loyiha hududda maktabgacha ta’lim qamrovini kengaytirish, bolalar uchun zamonaviy va qulay shart-sharoit yaratishga xizmat qiladi.
Obyekt buyurtmachisi Buxoro viloyat hokimligi huzuridagi “Yagona buyurtmachi xizmati” injeniring kompaniyasi hisoblanadi. Loyiha hujjatlari “Buxoroproekt” MChJ tomonidan ishlab chiqilgan bo‘lib, ayni kunda qurilish ishlarini “Elegant invest qurilish” MChJ ishchi-mutaxassislari olib borishmoqda.
Mazkur muassasa qayta qurilishining umumiy qiymati 6 milliard 186 million so‘mni tashkil etmoqda. Qurilish ishlari boshlanganiga ikki oy to‘layotgan bo‘lib, inshootni hademay, 1 avgust kuni foydalanishga topshirish ko‘zda tutilgan.
Barpo etilayotgan zamonaviy ta’lim muassasalari — bu nafaqat yangi binolar, balki yosh avlodning talab darajasida bilim olishi, o‘z salohiyatini ro‘yobga chiqarishi, kelajakda yuksak natijalarga erishishi uchun yaratilayotgan mustahkam poydevordir.
Viloyat hokimligi matbuot xizmati