Shofirkon: “Iskogare”da dual ta’lim asosida 200 nafar xotin-qiz bandligi ta’minlanmoqda
2026-05-13 22:35:00 / Yangiliklar
Shofirkon tumanida 200 nafar xotin-qizni ish bilan ta’minlovchi “Parvoz xumo ravnaq trans” MChJ tikuv korxonasi ishga tushirildi. Loyiha dual ta’lim tizimini rivojlantirish hamda kambag‘allikni qisqartirish, ehtiyojmand oilalar ayollarini daromadli qilish maqsadida amalga oshirildi. Shuningdek, bu loyiha texnikumlarda tahsil olayotgan yoshlarni dual ta’lim tizimiga keng jalb etish va ularga kasb-hunar o‘rgatish bo‘yicha amalga oshirilayotgan sa’y-harakat natijasida ro‘yobga chiqarildi.
Shofirkon tumani, Iskogare mahallasi ko‘p yildirki, chekka va iqtisodiy nochor hududlardan biri, ishsizlar soni yuqori bo‘lgan “og‘ir” toifadagi mahallalardan biri sifatida qayd qilingan. Hududni ishsizlikdan holi mahallaga aylantirish, aholi bandligini ta’minlash va dual ta’lim tizimini rivojlantirish maqsadida viloyat va tuman hokimliklari tashabbusi bilan shu yirik loyiha amalga oshirildi. Iskogare mahallasida faoliyat boshlagan “Parvoz xumo ravnaq trans” MChJning tikuvchilik korxonasi Shofirkon raqamli texnologiyalar texnikumi bilan hamkorlikda dual ta’lim tizimini rivojlantirish, mahallada kambag‘allik darajasini “nol” qiymatga tushirish maqsadini ko‘zlamoqda.
Korxona rahbari Zafar Rahimov boshchiligida tashkil etilgan bu tikuvchilik korxonasi 200 nafar xotin-qizni ish bilan ta’minlashni maqsad qilgan. Asosan erkaklar va ayollar kiyim-kechaklarini tikib tayyorlashga ixtisoslashgan korxona ayni kunda mahsulotlarini Rossiya, Qozog‘iston, Ozarbayjon kabi respublikalarga, hatto Italiya davlatiga eksport qilmoqda. Xususan, o‘tgan yilda Italiyaga 100 ming AQSh dollari miqdorida mahsulot eksport qilingan bo‘lsa, joriy yilda Shofirkonda ishlab chiqariladigan mahsulot eksport hajmini 200 ming AQSh dollariga yetkazish maqsad qilingan.
E’tiborlisi, mas’uliyati cheklangan jamiyati tomonidan kelgusida tumanning boshqa mahallalarida yana 5 ta shunday tikuvchilik korxonasini tashkil etish rejalashtirilgani yangi ish o‘rinlari yaratish, aholi daromadini oshirishda muhim omil bo‘lib xizmat qiladi. Ayni kunda korxonada faoliyat yuritayotgan xotin-qizlar uchun barcha shart-sharoit yaratilgan bo‘lib, ularga 2 million so‘mdan 5 million so‘mgacha oylik maosh tayinlangan va bepul tushlik, transportda tashish xizmatlari tashkil etilgan.
Shofirkon raqamli texnologiyalar texnikumida ayni kunda 351 nafar o‘quvchi tahsil olmoqda. Hozirda 30 nafar bitiruvchi o‘quvchi qiz mazkur tikuv korxonasida amaliyot o‘tamoqda. Bu esa dual ta’lim tizimining amaldagi samarali namunasi bo‘lib, ularni kelgusida doimiy ish bilan ta’minlanishiga zamin yaratmoqda.
Raqamli texnologiyalar texnikumi binosida “Parvoz xumo ravnaq trans” MChJning tikuv korxonasi ochilishida tuman hokimligi, tegishli mas’ullar, nuroniylar hamda jamoatchilik vakillari ishtirok etdilar.
Viloyat hokimligi matbuot xizmati