Buxoro viloyati hokimligi

An’anaviy festival mamlakatimizda xalq amaliy san’ati va hunarmandchilik sohasini rivojlantirishga qaratilgan keng ko‘lamli islohotlarning amaliy ifodasidir. Shu munosabat bilan bugun Buxoro shahridagi Abu Ali ibn Sino nomidagi Axborot kutubxona markazida ommaviy axborot vositalari vakillari, jurnalist va blogerlar uchun matbuot anjumani bo‘lib o‘tdi. Unda viloyat hokimining o‘rinbosari Botirjon Shahriyorov, respublika “Hunarmand” uyushmasi raisi Rasuljon Mirzaahmedovlar yig‘ilganlarga atroflicha ma’lumot berdilar.   
 

Ta’kidlanganidek, festivalning asosiy maqsadi—milliy hunarmandchilik an’analarini asrab-avaylash, zardo‘zlik va zargarlik san’atini zamon talablari asosida rivojlantirish, madaniy-gumanitar aloqalarni kengaytirish, boy tarixga ega mamlakatimiz va qadim Buxoroning  madaniy merosini xalqaro miqyosda keng targ‘ib qilishdan iboratdir.
 

Azaldan Sharq sivilizatsiyasining yirik madaniy markazlaridan biri sanalgan Buxoro zardo‘zlik va zargarlik san’ati maktablari bilan dunyoga mashhur. 2022 yilda Butunjahon hunarmandlar kengashi tomonidan Buxoro shahriga “Butunjahon hunarmandchilik shahri” maqomining berilgani  milliy amaliy san’atimizga bildirilgan yuksak xalqaro e’tirof bo‘ldi.
 

Nufuzli xalqaro festival doirasida “Ark” qo‘rg‘oni, “Poyi Kalon” ansambli, “Labi hovuz” majmuasi va “Nodir Devonbegi” madrasasi kabi tarixiy obidalarda qator madaniy va ilmiy tadbirlar tashkil etiladi.
 

Jumladan: zardo‘zlik va zargarlik mahsulotlari ko‘rgazmalari, milliy hunarmandchilik namoyishlari, xalq sayillari va konsert dasturlari, mahorat darslari, “Bukhara Fashion Days – 2026” liboslar namoyishi, xalqaro ilmiy-amaliy konferensiyalar, simpozium va ijodiy uchrashuvlar o‘tkaziladi.
 

Shuningdek, Baxshillo Jumaevning “Zarrin iplar musiqasi” nomli ijodiy ko‘rgazmasi festivalning eng muhim madaniy voqealaridan biri sifatida namoyish etiladi. Shuningdek, festival doirasida 12 ta nominatsiya bo‘yicha xalqaro ko‘rik-tanlov tashkil qilinib, ishtirokchilar ishlari nufuzli xalqaro hakamlar hay’ati tomonidan baholanadi.
 

Ayni vaqtga anjumanda qadar Afrika, Yevropa, Osiyo, Shimoliy Amerika va Tinch okeani mintaqalaridagi 38 davlatdan 120 nafardan ortiq xorijiy mehmonlar, hunarmandlar, olimlar va ommaviy axborot vositalari vakillari ishtirok etish istagini bildirgan. Shu bilan birga, O‘zbekistonning barcha hududlaridan 300 nafardan ziyod mahalliy hunarmand o‘z mahsulotlari bilan qatnashishi rejalashtirilgan.
 

Bugungi kunda respublika “Hunarmand” uyushmasi tizimida 26 mingdan ortiq a’zo va 119 mingdan ziyod shogird faoliyat yuritayotgan bo‘lib, bu mamlakatimizda xalq amaliy san’ati va hunarmandchilik sohasiga qaratilayotgan yuksak e’tibor, yaratilgan imkoniyatlarning yaqqol samarasidir.
 

Tashkilotchilar fikricha, mazkur festival milliy madaniy merosimizni xalqaro miqyosda keng targ‘ib qilish, xalqlar o‘rtasidagi do‘stlik va madaniy hamkorlikni mustahkamlash, shuningdek, turizm va kreativ industriyalarni rivojlantirishga munosib hissa qo‘shadi.

Matbuot anjumanida ommaviy axborot vositalari vakillari, jurnalist va blogerlar o‘zlarini qiziqtirgan savollarga mutasaddilardan javob oldilar.