Buxoro viloyati hokimligi

Joriy yilda bayram munosabati bilan Ikkinchi jahon urushi qatnashchilari va nogironlarining har biriga 30 million soʻm miqdorida bir martalik pul mukofotini toʻlash belgilangan. 

Shuningdek, bu kunda urush qatnashchilari, front orti mehnat faxriylari, keksalar va ustozlarga hurmat-ehtirom koʻrsatish, yolgʻiz va kam taʼminlangan faxriylarning turar joylari obodonlashtirilmoqda, turli xotira va qadrlash tadbirlari tashkil etilmoqda. Mustaqillik yillarida xizmat burchini bajarish chogʻida halok boʻlgan Vatan fidoyilarining xotirasi ham ulugʻlanmoqda. Ularning oila aʼzolariga moddiy va maʼnaviy yordam koʻrsatilmoqda.

Ona Vatanimiz tinchligi, xalqimiz osoyishtaligi yoʻlida jon fido qilgan harbiy xizmatchilarning mardligi va jasoratini targʻib qilishga qaratilgan maʼnaviy-vatanparvarlik tadbirlari oʻtkazilmoqda. 

Bugungi kunda Buxoro viloyatida 3 nafar urush qatnashchisi – Hojimurod Bektoshev, Fayzulla Xodjiyev va Ahmad Muhsinov  dorilomon kunlar shukronasi bilan yashamoqda. 

9-may – Xotira va qadrlash kuni munosabati bilan  viloyat hokimi, harbiy-maʼmuriy sektor rahbari Botir Zaripov boshchiligidagi mutasaddilar, huquqni muhofaza qilish idoralari, jamoatchilik vakillari shahar va tumanlarda istiqomat qilayotgan Ikkinchi jahon urushi qatnashchilari holidan xabar olib, davlatimiz rahbarining tabrigi va pul mukofotlarini yetkazdi.  

Mutasaddilar dastlab ichki ishlar organlari faxriysi Ahmad Muhsinov xonadonida boʻldilar. 

Koʻksini orden-medallar bezab turgan Ahmad Muhsinov navqiron 19 yoshida Buxoro shahridan harbiy xizmatga, aniqrogʻi, frontga yoʻl olgan edi. Urushdan soʻng uning qariyb 20 yillik faoliyati ichki ishlar tizimida kechdi. U yurt tinchligi va osoyishtaligi yoʻlida turli lavozimlarda ishladi.

1947-yilgacha qirgʻinbarot janggohda, soʻng Yevropaning turli davlatlarida armiya safida boʻldi. Urushdan keyingi yillarda Buxoro davlat pedagogika instituti (hozirgi Buxoro davlat universiteti) ning tarix fakultetida tahsil oldi. Bir muddat oʻrta maktabda pedagog sifatida yoshlarga saboq berdi. 

Mutasaddilar urush faxriysi, 101 yoshni qarshilagan otaxonni bayram bilan tabriklab, samimiy tilaklar bildirishdi, Ikkinchi jahon urushi qatnashchisiga pul mukofotlari va qimmatbaho sovgʻalar taqdim etildi.

Uchrashuvda Botir Zaripov Prezidentimizning Ikkinchi jahon urushida qozonilgan gʻalabaning 81 yilligi hamda Xotira va qadrlash kuni munosabati bilan yoʻllagan bayram tabrigini oʻqib eshittirdi. 30 million soʻm miqdoridagi pul mukofoti va bayram sovgʻalarini topshirdi. Prezidentimiz nomidan taqdim etilgan maxsus qimmatbaho sovgʻa esa urush faxriylariga boʻlgan cheksiz hurmat ramzi boʻldi.  

Shuningdek, otaxon ichki ishlar vazirligi, ichki ishlar boshqarmasi, viloyat hokimligi, “Nuroniy” jamgʻarmasi tomonidan ham moddiy ragʻbatlantirildi. Bundan tashqari, urush faxriysiga viloyat mudofaa ishlari boshqarmasi va boshqa tashkilotlar tomonidan ehtirom koʻrsatildi.  

Yoshlar jamoasi ham mazkur xonadonda boʻlib, otaxonga izzat-ikrom koʻrsatdi. Tinchlikni, Vatanni ulugʻlovchi sheʼrlar aytildi.

Shu kuni viloyat hokimi Botir Zaripov hamrohligidagi jamoatchilik vakillari Buxoro tumani “Turkon” mahallasida yashovchi Fayzulla Xodjayev xonadonida ham boʻlishdi.

Viloyat hokimi otaxonni bayram bilan samimiy tabriklab, Prezidentimizning bayram tabrigini oʻqib eshittirdi va pul mukofoti hamda qimmatbaho sovgʻalarni topshirdi. Ular koʻrsatgan jasoratni xalqimiz aslo unutmasligini, yana koʻp yillar rohat-farogʻatda yashashliklarini tiladi.
 
Oʻz navbatida urush faxriysi ham bugungi dorilomon zamonda urush va mehnat faxriylariga koʻrsatilayotgan cheksiz gʻamxoʻrlikdan nihoyatda mamnun ekanligini bildirdi. Qolaversa, yurtimiz tinchligi, ezgu niyatlarimiz ijobati, farzandlarimiz baxtu kamolini soʻrab duo qildi.

Shuningdek, Olot tumani “Yosh botir” mahallasida yashovchi Hojimurod Bektoshevga Prezident sovg’asi tabrigi va sovg’asi yetkazildi. 

Albatta, ikkinchi jahon urushi qatnashchilari, ular qatorida front ortida mehnat qilgan faxriylar, aholi farovonligi yoʻlida fidokorona xizmat qilgan mehnat qahramonlarining jasoratli ishlari kelgusi avlodlar uchun ibrat namunasi boʻlib xizmat qiladi.

Viloyat hokimligi matbuot xizmati