Shofirkon: “Talisangobod” mahallasida tomorqa yerlaridan unumli fodalanilmoqda
2026-05-08 17:15:00 / Yangiliklar
Ayni kunda talisangobodlik yoshlar bandligini ta’minlash, ularga daromad manbaini yaratish, qishloq xo‘jaligi orqali ishlab moddiy manfaat topishlari uchun 24 nafar yigit-qizga jami 6,4 gektar yer maydoni ajratib berilgan. Bu jarayonda mahalla yoshlar yetakchisi Aliyor Haydarov tomonidan yoshlar istagi, yerga bo‘lgan qiziqishi va tashabbuslarini qo‘llab-quvvatlashga e’tibor qaratilmoqda.
Shuningdek, hokimning Talisangoboddagi yordamchisi tashabbusi bilan 183 nafar talabgor fuqaroga qariyb 27 gektar yer maydoni ajratib berilgan bo‘lib, bu orqali yana o‘nlab oilaning bandligini ta’minlash, mahsulot yetishtirib, daromad olish imkoniyati yaratilgan.
Xuddi shunday, ajratilgan yer maydonidan unumli foydalanayotgan yoshlardan biri Murodjon To‘xtaev bo‘lib, u o‘z ixtiyoridagi 1,3 gektar yer maydonida ayni paytda kartoshka yetishtirish bilan shug‘ullanmoqda. E’tiborlisi, mahalla “ettigi” tomonidan yosh dehqonning faoliyatini qo‘llab-quvvatlash maqsadida dala yo‘lini chiqarib berish, sifatli urug‘lik ajratish murojaatlari ijobiy hal qilingan. Parvarishi talab darajasida olib borilayotgan bu yerdan Murodjon oila a’zolari bilan birgalikda 25 tonnadan oshirib hosil olish harakatida. Albatta, ro‘zg‘ordan oshiqcha mahsulot mahalladoshlar dasturxoniga tortiq qilinadi. Bozor bahosida bu 20 million so‘mdan kam bo‘lmagan daromad degani.
Mahalladagi yana bir mehnatkash tomorqachi Ro‘ziboy Toshev o‘ziga ajratilgan 3 gektar yerda poliz ekinlari, xususan, “obi navvot”, handalak va boshqa turdagi qishloq xo‘jaligi mahsulotlari yetishtirmoqda. Yer tayyorlash, mineral o‘g‘it, urug‘lik, texnika xizmati kabi sarf-xarajatiga yosh dehqon oilasi 10 million so‘m mablag‘ sarflagan bo‘lib, ayni paytda bajarilayotgan agrotexnik tadbirlar, halol mehnat va peshona teri evaziga yetilib pishadigan poliz mahsulotlaridan 100 million so‘mdan orttirib daromad kutilmoqda. Yarim yillik mehnat mahsuli esa 90 tonna atrofidagi mahsulotni saranjomlash maqsad qilingan.
Muhimi, Talisangobodda amalga oshirilayotgan yuqoridagi kabi tashabbuslar va zimmaga olinayotgan mehnat tomorqachi oilalar turmush tarzini yaxshilash, yer resursidan unumli foydalanib moddiy manfaatdorlikka erishishda muhim tajriba maktabi bo‘lib xizmat qilmoqda.
Viloyat hokimligi matbuot xizmati