Buxoro viloyati hokimligi

Viloyatning so‘lim maskanlarida joylashgan oromgohlarimizda bolajonlar uchun kuniga 5 mahal, to‘kin dasturxon atrofida to‘yimli ovqatlanish, shinam yotoqxona xizmati, 12 kunlik dastur asosida turli madaniy-ma’rifiy, sport tadbirlari, salqin hovuzlarda cho‘milish, intellektual o‘yinlar, turli yo‘nalishlarda to‘garaklar hamda noan’anaviy klublar faoliyati yo‘lga qo‘yilishi ayni huzurbaxsh.
 

Har yili 4 iyundan 15 avgust kunigacha tashkil etiladigan 5 ta smenada 7 yoshdan-14 yoshgacha bo‘lgan bolajonlar miriqib dam olishlari, asosiysi, ularning xavfsizligi va sog‘ligiga alohida e’tibor qaratilishi uchun zarur chora-tadbirlar boshlangan. Ayni kunda viloyat markazidagi “Buxoro”, G‘ijduvon tumanidagi “Bolalar sayyorasi”, Romitan tumanidagi “Romitan”, Peshko‘ tumanidagi “Peshko‘”, Vobkent tumanidagi “Porloq kelajak” va “Quyosh nuri” kabi bolalar oromgohlarida qizg‘in yoz mavsumiga puxta tayyorgarlik ishlari olib borilmoqda.
 

Vobkent tumanida har mavsumda faoliyat yuritadigan 3 ta yozgi oromgoh, jumladan, “Quyosh nuri”, “Nurli manzil”, “Porloq kelajak” bolalar oromgohlarini mavsumga shay qilish ishlari allaqachon boshlangan. “Quyosh nuri”da joriy mavsum 5 navbatda 750 nafar o‘g‘il-qiz, “Nurli manzil” oromgohida esa 400 nafardan ortiq bola maroqli dam olishi va salomatligini mustahkamlash ko‘zda tutilgan. Viloyat so‘lim maskanlaridan biri sifatida “Porloq kelajak” bolalar oromgohi quvvati oshirilib, hozirda bir navbatda 200 o‘ringa mo‘ljallangan bo‘lib, bunda jami 800 nafar bolani dam oldirish imkoniyati yaratilgan.
 

Oromgohlarda ertamiz egalari uchun barcha shart-sharoitga ega yotoqxona, oshxona, kompyuter xonasi, badiiy kitoblarga ega kutubxona, suv havzalari, jismonan chiniqishlari uchun futbol, voleybol maydonchalari hademay bunda miriqib hordiq chiqaradigan bolajonlarga beminnat xizmat qilishga shay.
 

“Quyosh nuri”da joriy mavsumda infratuzilma holati tanqidiy ko‘rib chiqildi. Xususan, aylanma o‘yin attraksioni, suv havzalari, sport maydonchalari ahvoli, yotoqxona va oshxona sanitariya holati, elektr va gaz ta’minotigacha batafsil o‘rganilib, kerakli tezkor choralarni ko‘rish, nuqson va kamchiliklarni bartaraf etish, hududni obodonlashtirish belgilandi. 
 

Yozgi oromgohlar — bolalar uchun nafaqat dam olish, balki rivojlanish maskani hamdir. Bu yerda ular yangi do‘stlar orttiradi, bilim va ko‘nikmalarini mustahkamlaydi, sog‘lom turmush tarziga amal qilishni o‘rganadi hamda kun tartibiga rioya etish orqali intizomni shakllantiradi. 
 

Shuningdek, yangi tartibga ko‘ra, kasaba uyushmalari tomonidan oromgohlarda dam oluvchi bolalar yo‘llanma to‘lovlarining bir qismi qoplab berilishi belgilangan bo‘lib, bu imkoniyat yanada ko‘proq bolani yozgi sog‘lomlashtirish maskanlariga jalb etish imkonini beradi. Ayni kunda mas’ul rahbariyat so‘lim maskanlarda barcha tadbirlarni talab darajasida, sermazmun tashkillashtirish, yozgi ta’tilni zavqli, xavf-xatarsiz o‘tkazish uchun tajribali pedagog, murabbiylar jamoasini shakllantirish harakatida.