Buxoro viloyati hokimligi

Mazkur xonadon egalari ko‘p yillik mehnati va bundan orttirgan tajribasi evaziga tomorqachilikni daromad manbaiga aylantirishga muvaffaq bo‘lgan. Ayni paytda ular hovli ichidagi yerning 1 sotixdan iborat qismida  issiqxona tashkil qilib, pomidorning erta pishar navidan yetishtirmoqda. Hademay, saranjomlanadigan hosil salmog‘i 500 kilogramdan, birinchi ekindan ko‘riladigan foyda esa 7 million so‘mdan kam emas. 
 

Uchqun Boboev xonadoni mavjud imkoniyatlardan unumli foydalanishi bilan ham e’tibor qozongan. “Har bir oila tadbirkor” dasturi doirasida hududdagi hokim yordamchisining amaliy ko‘magi bilan imtiyozli kredit olib, qo‘ziqorin yetishtirish faoliyatini ham yo‘lga qo‘ygan. Hozirda ular qo‘ziqorinning bozorbop va serhosil “Vishenka” navini parvarish qilmoqda.
 

Qorong‘i va salqin xonada yetishtirilayotgan, polietilen qopchalarni yorib chiqib bo‘y ko‘rsatayotgan qo‘ziqorindan bir yilgi mavsumda o‘rtacha 4-5 marta hosil yetishtirish, bundan mehnatga yarasha foyda ko‘rish mumkin. Atigi bir sotix yerda  boshlangan qo‘ziqorin yetishtirishdan xomaki mo‘ljalga binoan 40 million so‘mga yetkazib daromad olish imkoniyati allaqachon tajribada sinalgan. Hozirda o‘zgacha uslubda, qayta ishlangan chigit sheluxasida yetishtirilayotgan xaridorbop qo‘ziqorin bir oy muddatda sotishga tayyor bo‘ladi. Vazni yengil bo‘lgani bilan barakali mahsulot, ham xaridorgir. 
 

Xonadon bekasi Mashhura Azimovaning ta’kidlashicha, qo‘ziqorin yetishtirishning afzalligi  qisqa muddatda hosil olish va bunda parvarishining qiyin emasligidir. Atigi 40 kun ichida qo‘ziqorin tayyor bo‘ladi va bir oyda 500 kilogramgacha qo‘ziqorin yetishtiriladi. Ayni kunda qo‘ziqorin narxi o‘rtacha 20–25 ming so‘m atrofida ekanini hisobga olsak, bu faoliyat oilaga qo‘shimcha daromad olib kelmoqda. Muhimi, Boboevlar oilasi o‘z tajribasi bilan mahalladoshlariga ham o‘rnak bo‘lmoqda.