Kogon: “Bahouddin Naqshband” va “Sarayon” mahallalarida ham “kumush tola” zarshunoslari oz emas
2026-04-28 20:40:00 / Yangiliklar
Joriy yil mavsumi oldidan kogonlik pillakorlar Xitoy davlatidan keltirilgan 3 ming 222 quti ipak qurti parvarishidan mavsumda 194 tonna pilla xomashyosi yetishtirish chora-tadbirini ko‘rmoqdalar. Bu borada tumanning 7 ta hududidagi 12 ta inkubatoriyada urug‘ jonlantirilib, kasanachi, oilaviy zvenolarga tarqatilgan. Bu yil ular o‘tgan yilgiga qaraganda, 215 qutiga yoki 15 tonnaga ko‘proq “kumush tola” yetishtirishni maqsad qilishgan.
Ayni bahorgi pillachilik mavsumi uchun hududda yuqori hosildorlikka erishib kelayotgan va sifatli pilla yetishtirishda yetarli tajribaga ega 20 tadan ortiq fermer xo‘jaligi hamda jami 21300 ga yaqin kasanachi va oilaviy zveno bilan to‘g‘ridan-to‘g‘ri shartnoma tuzilgan.
Albatta, bu qamrov aholining ehtiyojmand qatlami moddiy manfaatdorligini ta’minlashda qo‘l kelmoqda. Qolaversa, pilla boquvchilar va kasanachilarning mavsum davrida bajargan ishlari ularga pensiya ta’minlashda bir yillik ish staji hisoblanadi. Bu imtiyoz, albatta, pillachilikni rivojlantirishda muhim omil bo‘lmoqda.
Jumladan, Bahouddin Naqshband mahallasida yashovchi ko‘p yillik tajribaga ega Rajaboy Boqieva oila a’zolari ko‘magida pillachilik bilan shug‘ullanib, joriy mavsumda 4 quti ipak qurtini parvarishlamoqdalar. Mehnatkash xonadonda 4 quti ipak qurtidan 300 kilogramdan oshirib hosil olish tajribada bor. Ish boshida ular 2 million so‘m avans-bo‘nak pul va qurt ozuqasiga yetarli tutzorni qabul qilishgan. “G‘alvir suvdan ko‘tarilganda” esa ko‘zda tutilgan daromad salmog‘i qariyb 15 million so‘mni tashkil etmoqda.
Shuningdek, Sarayon mahallasida istiqomat qiluvchi Dilnoza Atoeva ham tajribali kasanachilardan bo‘lib, oila a’zolari yordamida bu yil 8 quti ipak qurti boqmoqda. Bir oydan oshiqroq qilinayotgan mehnat mahsuli esa 550 kilogram atrofida bo‘lib, bundan xonadonning erishadigan qo‘shimcha daromadi 27 million so‘m atrofida kutilmoqda.
Sara va sifatli “kumush tola” yetishtirishda o‘ziga xos tajribaga ega hududda joriy yilgi mavsumda buyurtmachi “Kumushkent ipagi” MChJ sa’y-harakati bilan har qutidan olinayotgan hosil salmog‘i o‘rtacha 65 kilogramga yetishi ko‘zda tutilmoqda. Umuman, qishloq xo‘jaligida yilning dastlabki muvaffaqiyatiga erishishda ayniqsa, Siyozpoyon, Bahouddin Naqshband, Xo‘ja yakshaba, Yangi hayot, Sarayon, Niyozhoji, Kogon hududlaridagi oilaviy zvenolar jonbozlik ko‘rsatmoqdalar.
Viloyat hokimligi matbuot xizmati