Peshku: chevar Salomat Hayitova sexida 8 nafar ayolni ish bilan ta’minlamoqda
2026-04-24 18:35:00 / Yangiliklar
“Varaxsho” mahalla fuqarolar yig‘inida yashovchi Salomat Hayitova ham aksionerlik tijorat "Mikrokreditbank"ning Yangibozor filiali orqali tikuvchilik yo‘nalishida 50 million so‘m kredit mablag‘ini olib, dastlab 4 nafar, keyinchali yana 4 nafar mahalliy tikuvchi ayolni ish bilan ta’minladi. Hozirda mazkur “Salomat Iymona” nomi ostidagi tikuvchilik sexida buyurtma asosida ayollar va erkaklar kiyimlari, futbolkalar tikib tayyorlanmoqda.
Ayni paytda MChJ tikuvxonasida o‘ndan ortiq zamonaviy tikuv mashinasi mavjud bo‘lib, 8 nafar fuqaro doimiy ish va daromad manbaiga ega. Ularga kunlik ishi va tikkan mahsulotiga qarab oylik maosh to‘lanmoqda.
Umuman, o‘tgan yili ehtiyojmand oilalarning tikuvchilikka ishtiyoqi bo‘lgan 50 nafar ayoliga subsidiya asosida maishiy elektron jihoz—“JACK” va “JUKI” rusumli zamonaviy tikuv mashinasi olib berilgani ularga uyda ishlab, daromad topishlari uchun yana bir imkoniyatdir.
Jumladan, shu kunga qadar "Varaxsha" mahallasidan Ziyoda Shodieva, Anora Hakimova, "Turkiston" mahallasidan To‘xtagul Bobomurodova, Oydin Sobirova, "Peshku" mahallasidan Shodiya Hamroeva, Muhayyo Abdullaeva, "Yangiobod" mahallasidan Muslima Asadova, Zarifa Abdullaeva, "Talisobun" mahallasidan Sevara Salomova, Nodira Ochilova, "Malishoyak" mahallasidan Venera Saimovalar qo‘llarida gulday hunarlari bo‘la turib, uyda ishsiz va daromadsiz qolgandilar. Mahalla qo‘llab-quvvatlovidan so‘ng endilikda ular yakka tartibda chevarlik faoliyatini olib bormoqdalar.
Viloyat hokimligi matbuot xizmati