Buxoro viloyati hokimligi

Hayvonlar va odamlar uchun o‘ta xavfli bo‘lgan kuydirgi, quturish, brusellyoz, oqsil va “Qrim-Kongo” gemmoragik isitmasi kabi yuqumli kasalliklarning kelib chiqishi, oldini olish va qarshi kurashish to‘g‘risida aholi va fermer xo‘jaliklari  o‘rtasida doimiy ravishda tushuntirish va targ‘ibot-tashviqot ishlari olib borilmoqda. Mazkur oylik doirasida Peshku tumani, “Sadir” MFY dagi “Munira aya” fermer xo‘jaligida ham chorvachilik yo‘nalishida faoliyat yuritayotgan fermer xo‘jaliklari rahbarlari, chorvadorlar hamda mutaxassislar ishtirokida ko‘rgazmali o‘quv seminari tashkil etildi. 

Unda qatnashgan fermer va chorvadorlar bugun veterinariya xizmatiga qo‘yilayotgan talablar, tarmoq ishini rivojlantirishdagi yangilik va o‘zgarishlardan xabardor bo‘ldilar. Naslli qoramollar ulushini oshirish, ilmiy asosdagi parvarishlash tizimini joriy etish, qolaversa, bu jarayonda oziq-ovqat xavfsizligi, aholi salomatligi, ekologik barqarorlik qat’iy talab, me’zon ekanligi ta’kidlandi. 

—Bugunga kelib tumanda aholi xonadonlari, fermer va dehqon xo‘jaliklarida boqilayotgan yirik shoxli chorva mollari soni 132 ming boshdan ziyod bo‘lib, shundan 42 250 boshi sog‘in sigir, 97 ming boshdan oshig‘i bo‘rdoqiga boqilayotgan qoramollardir,—deydi tuman veterinariya va chorvachilikni rivojlantirish bo‘limi boshlig‘i Zavqiddin Qurbonov.—Ayni kunda hududda chorvachilikka ixtisoslashgan 36 ta fermer xo‘jaligi faoliyat yuritayotgan bo‘lib, ularda 3200 boshdan oshiq qoramol, 12 ming boshdan ko‘proq qo‘y-echki parvarish qilinmoqda. Aholi uy xo‘jaliklarida boqilayotgan qo‘y-echki soni bilan qo‘shganda, hozirda tuman miqyosida parvarishlanayotgan mayda shoxli chorva soni 296 ming bosh atrofida. 

Hududda chorvachilik yo‘nalishidagi “Agroklaster servis” MCHJ, “Qalaymirishkor bahori”, “Sadirov”, “Moviy osmon zamini”, “To‘ra” kabi fermer xo‘jaliklarida tuyoq sonini ko‘paytirish, parvarishni yaxshilash, mahsuldorlikni oshirish choralari ko‘rilmoqda. Bu xo‘jaliklarga o‘tgan yili xorijdan “Golshteyn”, “Smental”, “Angust”, “Gererford” kabi nasldor qoramollardan 750 bosh xarid qilib keltirilgan va zooveterinariya talablari asosida parvarishlanmoqda. Mahsuldorlikni oshirish maqsadida o‘tgan yili Mongoliyadan “Bayad” zotiga mansub qo‘ylar olib kelinib boqilmoqda. Qolaversa, shu kunda tumanda aholi xonadonlari bilan birgalikda ixtisoslashgan xo‘jaliklarda parvarishlanayotgan parranda soni 178 boshdan ko‘proq. 

Seminarda xo‘jaliklarda veterinariya-sanitariya madaniyatini oshirish, zamonaviy bioxavfsizlik choralarini joriy etishga ham alohida e’tibor qaratildi. Jumladan, fermalarga kirish joylarida dezinfeksiya to‘siqlarini tashkil etish, transport vositalari va ishchi xodimlar uchun sanitariya nazoratini yo‘lga qo‘yish, kasallik alomatlari aniqlangan hayvonlarni darhol ajratish va zararsizlantirish lozimligi ta’kidlandi.

Viloyat hokimligi matbuot xizmati