Oʻzbekiston Jurnalistlar uyushmasi Buxoro viloyati boʻlimi hamda viloyat hokimligi hamkorligida Samarqand shahriga media-sayohat tashkil etildi
2026-04-20 15:10:00 / Yangiliklar
Bunda viloyatning 30 nafardan ortiq jurnalistlari va yosh ijodkorlar qatnashib, qadimiy shaharning tarixiy hamda ilmiy-maʼrifiy maskanlari faoliyati bilan yaqindan tanishdilar.
Ishtirokchilar dastlab Imom Buxoriy majmuasida boʻlishdi. Ushbu muqaddas qadamjo keyingi yillarda keng koʻlamli obodonlashtirish ishlari natijasida 44 gektar maydongacha kengaytirilgan. Majmua tarkibida 10 ming kishiga moʻljallangan masjid, maʼmuriyat binosi hamda toʻrt burchagida 75 metrlik minoralar barpo etilgan. Bu inshootlar majmuaga ulkan mahobat bagʻishlab, uni islom olamidagi eng yirik ziyorat va maʼrifat markazlaridan biri sifatida namoyon etmoqda.
Imom Buxoriy majmuasi ziyorat maskani, hadis ilmi, maʼnaviyat va ilmiy tadqiqotlar uygʻunlashgan muhim markazligi bilan alohida ahamiyat kasb etadi. Bu yerda amalga oshirilgan ishlar ajdodlar merosini asrab-avaylash va uni kelajak avlodga yetkazish yoʻlidagi izchil islohotlarning amaliy ifodasidir.
Shundan soʻng ishtirokchilar Hadis maktabi faoliyati bilan ham tanishdilar. U yerda yoshlar uchun hadis ilmi asoslari, manbashunoslik va islom maʼnaviyati boʻyicha zamonaviy yondashuvda taʼlim berilayotgani taʼkidlandi.
Navbatdagi manzil Imom Buxoriy xalqaro ilmiy-tadqiqot markazida boʻldi.
Markaz Oʻzbekiston Respublikasi Vazirlar Mahkamasi huzurida tashkil etilgan boʻlib, Prezidentning 2017-yil 27-martdagi PQ-2855-sonli qarori ijrosi asosida faoliyat yuritmoqda.
Oʻtgan 9 yil davomida muassasa xalqaro ilmiy maydonda oʻz oʻrnini mustahkamlab, dunyoning 50 ta yetakchi islom tadqiqot markazlari hamda Oksford va Kembrij kabi nufuzli universitetlar bilan hamkorlik aloqalarini yoʻlga qoʻygan.
Markaz faoliyatida erishilgan natijalar ishtirokchilarda katta taassurot qoldirdi.
Xorijiy fondlardan olib kelingan 130 mingta qoʻlyozmaning elektron nusxalari toʻplangan, zamonaviy laboratoriyalarda 550 ta nodir qoʻlyozma kitob qayta tiklangan, Imom Buxoriy hamda boshqa mutafakkirlar asarlaridan 52 tasi ilk bor ona tilimizga tarjima qilingan. Shuningdek, 128 ta kitob va risola nashr etilgani qayd etildi.
Sayohat haqida ustoz jurnalist Jahongir Ismoilov oʻz fikrlarida shunday bildirdi:
— Biz bugun ilmiy muassasani, qolaversa, milliy oʻzligimizning anglatayotgan maskanni koʻrdik. Qoʻlyozmalarga boʻlgan ehtirom, restavratsiya ishlaridagi aniqlik va ilmiy yondashuv kishida faxr uygʻotadi.
Keyingi manzil Samarqand shahridagi Goʻri Amir maqbarasi va Registon maydonida boʻldi. Goʻri Amir majmuasi Sohibqiron Amir Temur va Temuriylar sulolasi dafn etilgan muqaddas qadamjo hisoblanadi.
Shuningdek, Registon maydonidagi madrasalar meʼmorchiligi, koshinkorlik sanʼati va tarixiy muhit ishtirokchilarda katta taassurot qoldirdi.
Jurnalistlar uyushmasi viloyat boʻlimi raisi Gulshoda Ibrohimova: Biz bugun Samarqand zaminiga shunchaki ziyoratchi emas, balki buyuk ajdodimizning vorislari sifatida keldik. Imom Buxoriy - bizning iftixorimiz, gʻururimiz.
Bugungi ijodiy safarimizning asl mohiyati ham hadis ilmi sultoni qoldirgan ilmiy xazinani, maʼnaviy merosni, nafaqat oʻrganish, balki uni qalbdan his qilishdir. Ilmiy-tadqiqot markazida olib borilayotgan ishlar, noyob qoʻlyozmalarning qayta tiklanishi - bularning barchasi Buxoro ilmiy maktabining bardavomligidan dalolat beradi. Biz Imom al-Buxoriyning muqaddas qadamjolarini ziyorat qilish orqali maʼnaviy quvvat oldik. Jurnalist va ijodkorlarimiz mana shu faxrlanish hissini, ajdodlarimizning dunyo ilm-fanidagi oʻrnini xalqimizga yetkazishlarini istardik.
Media-tur yakunida ishtirokchilar Buxoro va Samarqand oʻrtasidagi maʼnaviy va madaniy aloqalarni yanada mustahkamlash, tarixiy merosni asrab-avaylash va uni keng targʻib qilish yoʻnalishidagi ishlarga yuqori baho berdilar.
Zulfizar Mavlonova