Qorako‘lda sho‘r va suvsizlikka chidamli o‘simliklar—galofit bog‘i barpo qilinmoqda
2026-04-18 19:45:00 / Yangiliklar
“Yashil makon” umummilliy loyihasi doirasida o‘tgan yili viloyat bo‘ylab 15 million dona daraxt hamda buta ko‘chatlarini o‘tqazish, shahar va tumanlarda, cho‘lga tutash manzillarda jami 20 tadan oshiq “Yashil bog‘”lar barpo etish chora—tadbiri bosqichma-bosqich olib borilmoqda. Birgina Qorako‘l tumanida sho‘r va suvsizlikka chidamli o‘simliklar, ya’ni galofit bog‘lari tashkil qilishga kirishilgan.
Xuddi shunday, Qorako‘l tumanida 10 gektar maydonda “Galofit bog‘i” barpo qilinmoqda. Hududning tabiiy imkoniyatlari, cho‘l sharoitida barqaror ekotizim yaratish yo‘lidagi muhim amaliy qadam sifatida viloyat Ekologiya va iqlim o‘zgarishi bosh boshqarmasi xodimlari, o‘rmon xo‘jaligi mutaxassislari hamda Xitoydan tashrif buyurgan hamkor tashkilotlar vakillari ishtirokida hududda yetishtirilayotgan cho‘l o‘simliklarining holati atroflicha tahlil qilinmoqda.
Mazkur galofit bog‘ida hozirda 35 turdan ortiq sho‘r va qurg‘oqchil sharoitga moslashgan o‘simliklar parvarish qilinmoqda. O‘rganish jarayonida ularning ko‘karuvchanlik darajasi, mahalliy iqlimga moslashuvi, o‘sishi va umumiy biologik holati ilmiy asosda baholanmoqda.
Mutaxassislarning fikricha, galofit o‘simliklar – tabiatning o‘ziga xos moʻjizasi bo‘lib, ular sho‘rxok tuproqlarda ham samarali o‘sish xususiyatiga ega. Ekolog olimlarning ta’kidlaganidek, bunday o‘simliklar nafaqat yerning sho‘rlanish darajasini pasaytiradi, balki tuproq strukturasini yaxshilab, keyinchalik boshqa qishloq xo‘jaligi ekinlarini yetishtirish uchun zamin yaratadi.
Cho‘l massividagi ko‘chatlarni o‘rganish jarayonida xalqaro hamkorlik aloqalari mustahkamlanib, o‘zaro tajriba almashilmoqda. Xitoylik mutaxassislar o‘z mamlakatlarida galofit o‘simliklarni yetishtirish va ulardan samarali foydalanish bo‘yicha orttirgan tajribalarini vohamizda qo‘llamoqdalar. Ular tomonidan ilgari surilgan ilmiy tavsiyalar, ayniqsa, suv tanqisligi kuchayib borayotgan hududlar uchun muhim ahamiyatga ega.
Xorijiy ekspertlarning fikricha, Qorako‘ldagi bu loyiha Markaziy Osiyoda cho‘l hududlarini barqaror rivojlantirish uchun namuna bo‘ladi. Agar ilmiy yondashuv izchil davom ettirilsa, bu yerda yuqori samarador ekotizim shakllanadi.
Galofit bog‘lari ekologik muvozanatni saqlashda muhim o‘rin tutadi. Ular shamol eroziyasini kamaytiradi, atmosfera havosini yaxshilaydi va bioxilma-xillikni oshiradi. Bunday yashil hududlar cho‘l zonalarini o‘zlashtirish, ulardan oqilona foydalanish, barqaror muhit yaratishda samarali vositadir.
Chekka tumandagi “Galofit bog‘i” nafaqat ilmiy tadqiqot maydoni, balki ekologik muammolarga amaliy yechim topilayotgan innovasion platformaga aylanmoqda. Bu yerda olib borilayotgan ishlar kelgusida butun mintaqada cho‘llanishga qarshi kurashish va tabiiy resurslardan samarali foydalanish borasida muhim natijalar berishiga katta umid va ishonch bor.
Viloyat hokimligi matbuot xizmati