Buxoro viloyati hokimligi

Ma’lum bo‘lishicha, 1980-yilda tug‘ilgan bemor joriy yil 8-aprel kuni uch g‘ildirakli yuk motosiklida yo‘l-transport hodisasiga uchrab, turli darajadagi tan jarohatlarini olgan. Tibbiy ko‘rik natijasida bemorga bosh miya chayqalishi bilan birga chap oyog‘i son suyagining o‘rta uchligida ochiq sinish tashxisi qo‘yildi. Bunday holatlarda tezkor va yuqori malakali tibbiy yordam hayotiy ahamiyat kasb etadi.

Shifokorlar tomonidan bemorning holati chuqur o‘rganilib, zamonaviy usulda jarrohlik amaliyoti o‘tkazishga qaror qilindi. Xususan, chap son suyagini tiklash maqsadida kaminvaziv usulda bloklangan intramedullyar osteosintez (BІOS) amaliyoti bajarildi. Bu usul suyak ichiga maxsus metall implant o‘rnatish orqali sinishni ichkaridan mustahkamlashga xizmat qiladi. Natijada operatsiya kam jarohat bilan o‘tadi, qon yo‘qotish kamayadi va bemorning sog‘ayib, oyoqqa turish jarayoni tezlashadi.

E’tiborlisi, puxta tayyorgarlik bilan o‘tkazilgan mazkur murakkab jarrohlik amaliyoti tuman tibbiyot birlashmasida ilk bor amalga oshirildi. Bunda respublika Shoshilinch tibbiy yordam ilmiy markazi Buxoro filiali tor doiradagi mutaxassislari, ortoped travmatologlari Aloviddin Oripov, Nodir Umarov, Abror Ashurovlarning bilimlari, kasbiy mahorati, hamkorlikdagi yordamlariga tayanildi.  

Mazkur jarrohlik amaliyoti hudud tibbiyotida yuqori texnologiyali jarrohlik xizmatlarini yo‘lga qo‘yish, aholi salomatligini muhofaza qilish borasida olib borilayotgan ishlarning yana bir muhim natijasidir.

Viloyat hokimligi matbuot xizmati