Buxoro viloyati hokimligi

Bugun viloyat markazidagi “Universal” sport majmuasida bitiruvchi talabalar va ular tahsil olayotgan oliy ta’lim muassasalari rahbariyati, shuningdek, viloyat shahar va tumanlaridagi korxona-tashkilot, muassasa va boshqarmalar ish beruvchilari ishtirokida “Kelajagingni tanla” shiori ostidagi “Kar’yera kuni-2026” deb nomlangan mehnat yarmarkasi bo‘lib o‘tdi. 

Tadbirni viloyat hokimi Botir Zaripov kirish so‘zi bilan ochib,  viloyatimizdagi ta’lim muassasalarini tamomlab, hayotning yangi bosqichiga qadam qo‘yayotgan barcha bitiruvchi yoshlarni samimiy tabriklab, yosh mutaxassislar  kelajagiga ishonch bildirdi.   

Bo‘sh ish o‘rinlari mehnat bozorida jumladan, Buxoro davlat universiteti, Buxoro davlat tibbiyot instituti, Buxoro davlat texnika universiteti, Buxoro davlat pedagogika instituti bitiruvchi yosh mutaxassislari o‘z xohish-istaklariga binoan tanlovni amalga oshirish imkoniga ega bo‘ldilar. Ular uchun xalq xo‘jaligi barcha tarmoqlari, ishlab chiqarish, ijtimoiy soha inshootlari, maktabgacha va maktab ta’limi, sog‘liqni saqlash, tibbiyot birlashmalari, qishloq xo‘jaligi, irrigatsiya va melioratsiya sohasi, qo‘shma korxona, zavod, fabrikalar, barqaror ishlayotgan tadbirkorlik korxonalari o‘z ish o‘rinlari vakansiyasini taklif etdi. 
 
—2025-2026 o‘quv yili uchun universitetimizda 5 241 nafar, shundan 4755 nafar bakalavriat ta’lim yo‘nalishlarida va 486 nafar magistratura mutaxassisliklari bo‘yicha talabalar tahsil olishmoqda,—deydi Buxoro davlat universiteti rektori Obidjon Hamidov.— Joriy yilda universitetni 3911 nafar talaba tamomlamoqda. Shundan, 958 nafari boshqa viloyatlardan kelgan talabalar bo‘lsa, qolgan 3047 nafari viloyatimiz talabalaridir. 

Bitiruvchilarimizning 1 556 nafari ta’lim bilan bir vaqtda bandligi ta’minlanganlar hisoblanadi. 2026-yil boshidan shu kunga qadar 37 nafar bitiruvchiga turli yo‘nalishda jami 4 milliard 715  million so‘m miqdorida imtiyozli kreditlar ajratilgan. Jumladan, “Tadbirkorlikka ilk qadam” kredit paketi bo‘yicha 33 nafar bitiruvchiga 615 million so‘m, “Biznes start” va “Biznes progress” kredit liniyalari bo‘yicha 4 nafar bitiruvchiga 400 million so‘mdan oshiq imtiyozli kredit mablag‘i ajratilgan. 

Shuningdek, 518 nafar bitiruvchi ta’limni keyingi bosqichlarda davom ettirishini rejalashtirgan bo‘lsa, 51 nafari kasb-hunar o‘rganish orqali bandlikka erishmoqchi. Bu borada viloyat hokimligi, Kambag‘allikni qisqartirish va bandlikka ko‘maklashish viloyat bosh boshqarmasi va boshqa tashkilotlar bilan hamkorlikda yosh mutaxassis sifatida barcha bitiruvchilarimizni ish bilan ta’minlash harakatidamiz. “Karyera kuni – 2026” mehnat yarmarkasi ham ular uchun qulay imkoniyatdir.  

—Mehnat yarmarkasida o‘zimizdagi 44 ta bo‘sh ish o‘rni bilan qatnashyapmiz,—deydi Jondor tuman maktabgacha va maktab ta’limi bo‘limi shoʻba mudiri Bobir Po‘latov.—Universitet va pedagogika institutining aniq va ijtimoiy fanlar bo‘yicha yosh mutaxassislariga ehtiyojimiz bor. Maktablar va bolalar bog‘chalarimizda kimyo, biologiya, rus tili, xorijiy tillar, musiqashunoslik fanlari bo‘yicha kadrlar yetishmaydi. Shu bois, bugun Buxoro davlat universitetini bitirayotgan Sardor Po‘latovga 2-sonli umumta’lim maktabiga kimyo fani o‘qituvchisi vazifasiga, yana bir bitiruvchi Otabek Ravshanovga Rabot qishlog‘idagi 23-sonli,  Mehrangiz Rajabovaga esa Xumin mahallasidagi 7-sonli bolalar bog‘chasiga musiqa fani o‘qituvchiligiga tavsiyalar berildi. Bunda ular oylik maoshlari 3,5 million so‘m atrofida.

 —“Karyera kuni – 2026” ochiq eshiklar kuniga tumanimizdagi 10 ta tashkilot va korxonaning 136 ta vakant ish o‘rni bilan keldik,—deydi Qorovulbozor tumani kambag‘allikni qisqartirish va bandlik bo‘limi bosh mutaxassisi Xurshid Hamdamov.—Masalan, tuman tibbiyot birlashmasida xirurg, pediatr, terapevt, sanitariya-epidemiologiya xizmati mutaxassislari yetishmaydi. Holbuki, tor doiradagi bu mutaxassislar uchun 5 million so‘m oylik maosh belgilangan. Shuningdek, “Sulfo Tech” MCHJda 6 ta kimyo-laborant ish o‘rni uchun 4 million so‘mdan oylik maosh e’lon qilingan. Qolaversa, hududdagi 1-, 5-, 8-, 9-sonli maktabgacha ta’lim tashkilotlari uchun musiqa ta’limi bo‘yicha saboq beradigan mutaxassislarni izlayapmiz. Oylik maosh 3,5 million so‘m atrofida. Tuman texnikumi esa hozirda o‘rni bo‘sh ingliz tili o‘qituvchisi uchun 3,6 million so‘m oylik maosh e’lon qilgan.  

— Buxoro davlat pedagogika institutining jismoniy madaniyat fakultetini bitiryapman,—deydi tadbir qatnashuvchisi Sevinch Normurodova. — O‘z tanlovimga ko‘ra, Shofirkon tumanidagi 16- va 37-sonli bolalar bog‘chalaridagi jismoniy tarbiya yo‘riqchisi bo‘sh ish o‘rinlari uchun tavsiya oldim. Oylik maoshi 3 million so‘m atrofida ekan.     
             
—Bugungi bo‘sh ish o‘rinlari yarmarkasiga viloyatning davolash-profilaktika muassasalari, barcha tumanlar tibbiyot birlashmalari jami 334 ta vakant o‘rni bilan qatnashmoqda,—deydi viloyat sog‘liqni saqlash boshqarmasi kadrlar bo‘limi boshlig‘i Bahodir Sherov.—Ayni kunda hatto, viloyat ko‘p tarmoqli tibbiyot markazi yuz-jag‘ jarrohi, FD EEG, nevrolog, anesteziolog, endokrinolog kabi tor doiradagi mutaxassislarga ehtiyoj sezmoqda. Ular uchun 4-6 million so‘m atrofida oylik maosh belgilangan. Bu borada Buxoro davlat tibbiyot instituti bilan yaqin hamkorlikda ish olib bormoqdamiz.

Viloyat hokimligi matbuot xizmati