Kogon: hunari ortidan Sunnat Axmedov mahalladoshlari bandligiga ham hissa qo‘shmoqda
2026-04-14 19:10:00 / Yangiliklar
“Taraqqiyot” mahalla fuqarolar yig‘ini, Dehmirzayon qishlog‘ida istiqomat qiluvchi Sunnat Axmedov bugun o‘z mehnati, mavjud imkoniyatdan oqilona foydalanayotgani bilan nafaqat oilasiga daromad kiritmoqda, balki mahalla rivojiga ham munosib hissa qo‘shayotgan tashabbuskorlardan biri.
Bir necha yil burun u faoliyatini elektr payvandlovchiligidan boshlagan. Hunarga bo‘lgan qiziqishi va intilishi tufayli o‘tgan yili hokim yordamchisi ko‘magida ajratilgan imtiyozli kredit mablag‘ini olib, bu sarmoyaga zamonaviy rusumdagi zarur texnika jihozlarini xarid qilgan va o‘zining kichik syexini tashkil etgan. Bugun bu syexda metallga ishlov berilib, turli xil va ko‘rinishdagi, mustahkam darvozalar, temir panjaralar, shuningdek, qurilishbop qoliplar, metal konstruksiyalar tayyorlanmoqda. Mahsulot sifati va raqobatbardoshligi mijozlar safini kengaytirib, buyurtmalari sonini oshirmoqda.
Sunnat Axmedov nafaqat payvandlovchi hunarmand sifatida, balki kichik korxonasiga ega tadbirkor sifatida mas’uliyatni his etib, mahalladoshlarini ish bilan ta’minlashda ham faollik ko‘rsatmoqda. Hozirgi kunda uning syexida 3 nafar ishchi mehnat qilayotgan bo‘lsa, “Hunar hunardan unar” deganlaridek, yoshlardan yana o‘nga yaqin shogird tayyorlanmoqda. Ularga metallga ishlov berish, payvandlash sirlari o‘rgatib kelinmoqda.
Yosh tadbirkorning ta’kidlashicha, ayni kunda syexda tayyorlanayotgan metall konstruksiyalar hisobidan oyiga 15-18 million so‘mga yetkazib daromadga erishilmoqda. Bu degani, kichik korxonaning yillik erishayotgan moddiy manfaatdorligi 150 million so‘mdan kam emas. Buyurtma asosida tayyorlanayotgan mahsulotlar o‘z xaridorini topgan ekan, tashabbuskor tomoni faoliyatini kengaytirish harakatiga tushgan.
Viloyat hokimligi matbuot xizmati