Shofirkon: tomorqada birgina hosilga 3 million so‘m sarflab, 30 million so‘m foyda ko‘zlanmoqda
2026-04-12 16:30:00 / Yangiliklar
Obloqulovlar xonadonidagi ekin yeri 20 sotixdan iborat bo‘lib, shundan 7 sotix maydonda issiqxona tashkil etilgani daromad manbai bo‘lib xizmat qilmoqda. Negaki, bu yerda yilning to‘rt faslida sabzavot hamda ko‘katlar yetishtirilayotganini ko‘rish mumkin. Yil boshidan kartoshka, keyinchalik pomidor, bodring, sarimsoqpiyoz, bulg‘or qalampiri, baqlajon, sabzi, sholg‘om kabilar yetishtirib kelinadi.
Tomorqa mehnatini yanada rivojlantirish maqsadida 2025 yilda hokimning Kalondagi yordamchisi Bobur Qudratovning tavsiyanomasi asosida Furqat Obloqulov oilasiga 33 million so‘m miqdorida imtiyozli kredit mablag‘i ajratilib, issiqxona qurilishiga ko‘mak berilgan.
Bundan tashqari, bu xonadon bekasi Ziroat Saidovaga subsidiya asosida motokultivator olib berilgani tomorqadagi agrotexnik ishlarni yengillashtirib, mahsulot yetishtirishdagi samaradorlikni yanada oshirmoqda. Albatta, yil boshidan ekin yerida har bir ekin rejalashtirilib, aniq hisob-kitob asosida daromad olish ko‘zda tutilgan.
Masalan, 6 sotix maydonga ekilgan sabziga 3 million so‘m xarajat qilingan bo‘lib, undan salkam 3 tonnaga yetkazib hosil olish ko‘zda tutilgan. Bu hosil sotuvidan esa 30 million so‘mdan oshirib daromad olish kutilmoqda, Xuddi shunday, sarimsoqpiyoz yetishtirish uchun urug‘lik, mineral o‘g‘it kabilarga 1,5 million so‘m atrofida mablag‘ sarflangan bo‘lib, hosil yetilganida undan qariyb 20 million so‘m daromad olish mo‘ljallangan.
Yoz mavsumi oldidan yig‘im-terim ishlari yakunlangach, tomorqada takroriy ekin ham puxta rejalashtirilgan. Xususan, bulg‘or qalampiri yetishtirish orqali yil davomida birinchi va ikkinchi hosillardan jami 90 million so‘m sof foyda olish niyat qilinmoqda.
Albatta, “holva degan bilan og‘iz chuchimas”, oilaning 4 nafar a’zosi kasb-kori turlicha bo‘lsada, tomorqada ishlab, qo‘shimcha daromad olishni yoshligidan o‘rganib, mehnatni zimmalariga olishgan. Bu ham oilaviy tadbirkorlik sifatida daromadni ko‘paytirishga xizmat qilmoqda.
—O‘tgan yili tomorqamizda qilgan mehnatimiz va orttirgan daromadimimiz hisobidan yangi avtomashina sotib oldik,—deydi namunali tomorqachi Furqat Obloqulov.—Bu yil esa chorvachilikni rivojlantirib, nasldor chorva mollari xarid qilishni maqsad qilganmiz. Inson mehnat qilsa, ham jismonan sog‘lom bo‘ladi, ham daromadga erishadi.
Viloyat hokimligi matbuot xizmati