Universitet talabalari “O'zmilliybank” AJ va "Kelajakka qadam" markazi rahbariyati bilan uchrashdilar
2026-04-08 19:20:00 / Yangiliklar
O‘zbekiston Respublikasi Prezidentining 2025 yil 11 fevraldagi “Oliy ta’lim tashkilotlari bitiruvchilarining ishga joylashishiga ko‘maklashish bo‘yicha qo‘shimcha chora-tadbirlar to‘g‘risida”gi PQ–61 sonli qarori qabul qilingan.
Mazkur qarorga muvofiq, oliy ta’lim tashkilotlari bitiruvchilarini ish bilan ta’minlagan tadbirkorlarga 2 yillik imtiyozli davr bilan 7 yil muddatga 5 milliard so‘mgacha yillik Markaziy bank asosiy stavkasidan 4 foizlik punkt yuqori stavkada kreditlar ajratish belgilandi. Bunda imtiyozli kredit tadbirkorlarga har bir milliard so‘m qiymatgacha bo‘lgan mablag‘ uchun kamida 1 nafar bitiruvchini ishga qabul qilish sharti bilan ajratiladi.
Kredit ishlab chiqarish va xizmat ko‘rsatish sohasidagi loyihalarga asosiy vositalar sotib olish hamda aylanma mablag‘larni to‘ldirish uchun ajratiladi. Tadbirkor uning imtiyozli kredit olishiga sabab bo‘lgan bitiruvchi o‘rtasida 2 yil davomida mehnat shartnomasi bekor bo‘lgan taqdirda, kredit foizi mehnat shartnomasi bekor bo‘lgan sanadan tijorat stavkasiga o‘zgartiriladi.
Yuqoridagi qaror bo‘yicha "Kelajakka qadam" Dastur doirasida oliy ta’lim tashkilotlari bitiruvchilari uchun “O'zmilliybank”ning viloyat filialidan “Kelajak uchun start” kredit paketi joriy qilingani oliy ta’lim dargohi bitiruvchilari uchun yana bir imkoniyatdir. Buxoro davlat universitetida “O'zmilliybank” AJ “Kelajakka qadam” markazi rahbariyati hamda bitiruvchi talabalar bilan bo‘lib o‘tgan uchrashuvda shu xususida so‘z bordi.
Ochiq muloqotni respublika Oliy ta’lim, fan va innovatsiyalar vazirining o‘rinbosari O‘ktam Salomov ochdi. U o‘z so‘zida davlatimiz rahbarining bu boradagi qarori mazmun-mohiyatiga to‘xtalib, bitiruvchi yoshlarni ish bilan ta’minlash, ularning bandligini oshirish va kasbiy faoliyatga yo‘naltirish borasida amalga oshirilayotgan chora-tadbirlar haqida to‘xtaldi.
Viloyatimizdagi davlat va nodavlat oliy ta’lim muassasalari rahbariyati, bitiruvchilar, studiyalardan mas’ullar ishtirok etgan tadbirda Buxoro davlat universiteti rektori Obidjon Hamidov bitiruvchilarni ish bilan ta’minlashda tizimli olib borilayotgan ishlar to‘g‘risida axborot berdi.
Shuningdek, “O'zmilliybank” AJning viloyat filiali boshqaruvchisi Obid Shodiyev so‘zga chiqib, "Kelajakka qadam" Dasturi mazmun-mohiyati, uning imkoniyatlari hamda bitiruvchi yoshlarni qo‘llab-quvvatlash borasidagi ahamiyati, bitiruvchilar uchun yaratilayotgan shart-sharoit haqida batafsil ma’lumot berdi. Mazkur uchrashuv talaba-yoshlarni ish bilan ta’minlash, ularning tadbirkorlik tashabbuslarini qo‘llab-quvvatlash va mustaqil faoliyat boshlashi uchun qulay imkoniyatlar yaratishda muhim ahamiyat kasb etmoqda.
Viloyat hokimligi matbuot xizmati