Buxoro viloyati hokimligi

Tahlillarga ko‘ra, asosiy “drayveri”, ya’ni, o‘sish tarmoqlari issiqxonachilik va chorvachilik bo‘lgan Tarnautda 1 ming 42 ta xonadon tomorqasidan samarali foydalanib kelinmoqda. Xuddi shunday, 870 ta xonadonda jami 1 ming 755 bosh yirik shoxli, 3 ming 552 mayda shoxli qoramol, 460 ta xonadonda esa 6 mingdan ziyod parranda parvarishlanmoqda.

Ayni kunda mahallada issiqxonachilik, chorvachilikni rivojlantirish bo‘yicha aniq chora-tadbirlar belgilangan. Natijada hududdagi issiqxonalarda hosildorlikni oshirib, ishsiz aholini ish bilan ta’minlash, qishloq xo‘jaligi mahsulotlari xaridorgirligini oshirib, bozor va aholi dasturxoni to‘kinligini ta’minlashga e’tibor qaratilmoqda.

—Yerdan unumli foydalangan inson baraka topadi,—deydi Tarnaut qishlog‘ida yashovchi Dilobar Ramazonova.— Keyingi yillarda 12 sotixda issiqxona qurib, dehqonchilik qilib kelmoqdamiz. Bahorda pomidor, bodring, bulg‘or qalampiri, baqlajon urug‘larini ekib ko‘chat yetishtiramiz. Mavsumda qishlog‘imizning 8 nafar ishsiz ayolini ishga yollab, mehnatiga yarasha, 2 million so‘m atrofida ish haqi beramiz. Erta bahor mavsumida tayyor nihollarni bozorga olib chiqishimizga hojat yo‘q, chunki, xaridorlar, tomorqa yer egalari o‘zlari tomorqadan kelib olib ketishadi. Bir yil davomida 200 million so‘mdan oshirib daromad olish tajribasiga egamiz.

Mahallada ilgaridan issiqxona xo‘jaliklari bo‘lgan, hududda  samarasiz foydalanib kelinayotgan 12 gektardan ortiq yer maydoni 3 yil burun ehtiyojmand deb topilgan 150 ta oilaga o‘rtacha 10 sotixdan auksion orqali ajratilgani bu borada yana bir qulaylik bo‘ldi.

Bu bilan har bir tomorqachi oila yil davomida issiqxona xo‘jaligini yuritib, 100 million so‘mga yetkazib daromad topish imkoniga ega bo‘ldi. Muhimi, tomorqachilikda band bo‘lgan aholi soni 400 nafardan oshdi. Asosiysi, tomorqa yerlarini obod qilib, ularda o‘ndan ortiq qishloq xo‘jaligi mahsulotlarini yetishtirish orqali hududda turmush sharoitlari yaxshilanmoqda.  

Viloyat hokimligi matbuot xizmati