Buxoro viloyati hokimligi

Xususan, gʻalla ekinlarini oʻz vaqtida mineral va mahalliy oʻgʻitlar bilan oziqlantirish, shuningdek, sugʻorish ishlarini “sharbat” usulida tashkil etish orqali oʻsimliklarning vegetativ rivojlanishi qoʻllab-quvvatlanmoqda. Bunda agrotexnik tadbirlarning oʻz muddatida va sifatli bajarilishiga alohida eʼtibor qaratilib, har bir dala, kontur miqyosida nazorat kuchaytirilgan.
 

Maʼlumotlarga koʻra, tumanda jami 261 ta fermer xoʻjaligi tomonidan 4 ming 511 gektar maydonda gʻalla parvarishlanmoqda. Mazkur maydonlarda olib borilayotgan izchil ishlar natijasida ekinlarning barqaror oʻsishi taʼminlanib, yaqin oylarda moʻl va sifatli hosil yetishtirish uchun mustahkam zamin yaratilmoqda. 
 

Tuman gʻallakorlari joriy yilda har gektar hosildorligini oʻrtacha 70 sentnerdan oshirish, yaʼni yalpi sara bugʻdoy xirmonini 31 ming tonnaga yetkazishni maqsad qilishgan. Ahamiyatlisi, bu hosilning yarmidan ortigʻi fermer xoʻjaliklari mehnat jamoalari moddiy manfaatdorligi uchun sarflanadi.   
 

Shu kunlarda tumanning “Bahouddin Naqshband” hududidagi "Kogon Axtam Aslbek" fermer xoʻjaligi mehnatkashlari ham 40 gektar yerda sara navli gʻalla yetishtirmoqdalar. Jamoa agrotexnik tadbirlarni kechiktirmasdan, talab darajasida olib bormoqda. Bor kuch va imkoniyat mavjud konturlardan yigʻib olinadigan gʻalla salmogʻini 300 tonnaga yetkazishga qaratilgan. Oʻtgan yillar tajribasidan koʻrinishicha, jamoa mirishkorlari bu xirmonni qatʼiy mehnat, harakat bilan emin-erkin uddalaydilar.  
 

Erta bahordan dalada gʻalla parvarishida fermer xoʻjaliklariga oʻsimliklar karantini va himoyasi agentligi tuman boʻlimi mutaxassislari ham yaqin koʻmakchi boʻlishmoqda. Dala sharoitlari muntazam oʻrganilib, fermerlarga turli kasalliklar, zararkunanda va hasharotlarga qarshi biologik kurashish borasida amaliy tavsiyalar berilmoqda.