Kogon tumani: Navroʻz, Sarayon, Choloki, Beklar va boshqa mahallalarda ichimlik suvi taʼminoti yaxshilanmoqda
2026-03-25 10:25:00 / Yangiliklar
Oʻtgan 2025-yil davomida tumanda ”Islom taraqqiyot banki” va OPEK xalqaro taraqqiyot jamgʻarmasi ishtirokida 2 ta zamonaviy mahalla markazi, 3 ta maktabgacha taʼlim tashkiloti hamda 1 ta umumtaʼlim maktabi yangidan barpo etildi. Shuningdek, umumtaʼlim maktablarida qurilish-taʼmirlash ishlari olib borilib, barkamol avlod vakillari taʼlim-tarbiyasi uchun munosib shart-sharoit yaratildi.
Qolaversa, “Islom taraqqiyot banki” va OPEK xalqaro taraqqiyot jamgʻarmasi ishtirokida Kogon tumani aholini toza ichimlik suvi bilan taʼminlashda qator loyihalar amalga oshirilmoqda. Xususan, xorijiy jamgʻarma ishtirokida tumanning “Navroʻz” mahalla fuqarolar yigʻinida 21 ming metr, "Yangi hayot" mahalla fuqarolar yigʻinida 28 ming metr, "Beklar" mahalla fuqarolar yigʻinida 12 ming metr masofaga ichimlik suv tarmogʻi tortilayotgani yuqoridagi fikrimiz dalili.
Shu bilan birga , tumanning "Mustaqillik" mahalla fuqarolar yigʻinida 45 ming metr, "Sarayon" mahalla fuqarolar yigʻinida 18 ming metr, "Choloki" mahalla fuqarolar yigʻinida 25 ming metr, "Kogon" mahalla fuqarolar yigʻinida 8 ming metr masofaga vodoprovod liniyasi tortilib, aholining toza ichimlik suviga boʻlgan talabini qondirish choralari koʻrilmoqda.
Umumiy hisobda, tuman miqyosida 157 kilometrni tashkil etgan bu keng koʻlamdagi loyiha jadal boshlangan va yaqin oyda toʻla-toʻkis roʻyobga chiqarilgach, hududda yashovchi 8 mingdan ortiq xonadon ilk bor toza va sifatli, vodoprovodlashgan ichimlik suvi bilan taʼminlanadi. Qolaversa, mahallalardagi 9 ming 600 ta xonadonda mavjud ichimlik suv taʼminoti yaxshilanadi va bu bilan aholining turmush darajasini yanada yaxshilash imkoniyati yaratiladi.
Viloyat hokimligi matbuot xizmati