Vobkent: Moʻminoboddagi asalarichilar xonadonida yangi mavsumga puxta tayyorgarlik boshlangan
2026-03-23 15:30:00 / Yangiliklar
Kosari, Qipchoq, Rabotoxun, Qoʻqin, Kumushkent, Xayrobod kabi hududlarda asalari oilalarini boqib koʻpaytirish, “ming dardga davo” bol yetishtirishga eʼtibor va ragʻbat oshmoqda. Buning eʼtirofini tumanda har yili pishiqchilik mavsumida asal saylini oʻtkazish urfga kirayotganida ham koʻrish mumkin.
Asal ming dardga davo deya bejiz aytilmagan. Tabiiy toza mahsulot inson organizmini xastalikdan asrash, hatto yoshartirish xususiyatiga ega. Vobkent tumani, Moʻminobod mahallasida yashovchilar esa asalarichilik odamlar sogʻligi uchun koni foyda ekanligi bilan birga, tadbirkorlar uchun serdaromad biznes, foydali tarmoq ekanligini yaxshi bilishadi.
Shu mahallada yashovchi Farhod Sharipov xonadonida parvarishlanayotgan asalari oilasi soni yuztadan ortdi. Hokimning mahalladagi yordamchisi tavsiyanomasi asosida 2022-yilda 33 million soʻm imtiyozli kredit mablagʻi olib ish boshlagan tashabbuskor bir yilgi mavsumda 1 ming kilogram asal hosilini yigʻib olib, oilasi moddiy manfaatdorligini oshirmoqda. Bu xonadon aʼzolari mehnatkash, hunarmand, koʻngli ochiqligi bilan mahallada izzat-hurmat qozonishgan.
Farhod Sharipovning ayoli Gulchehra Shodiyeva ham mahalla koʻmagida 10 million soʻm imtiyozli kredit sarmoyasini olib, tikuv mashinalari xarid qilgan. Tikuvchilik hadisini olgan oila bekasining qoʻl ishlariga xaridor bisyor. Bugun u nafaqat oʻzini, balki sohaga qiziqqan qizi hamda ikki nafar hamqishlogʻini ham ish bilan taʼminlagan. Bundan tashqari, Farhod akaning qizlari Marjona Axtamova ham 7 million soʻm imtiyozli kredit mablagʻi asosida issiqxonaga ega boʻlgan. Bu issiqxonada ishlab, kartoshka va pomidor hosili yetishtirib, oila daromadiga baholiqudrat hissasini qoʻshmoqda.
Birgina xonadonda bugun asalarichilik, tikuvchilik, issiqxona xoʻjaligi rivojlantirilib, shunga yarasha daromadga erishilmoqda. Issiqxonadagi pomidor koʻchatlari gullash arafasida. Asalarichilikni oilaviy tadbirkorlikka aylantirib, mehnati ortidan barakali daromad topayotgan xonadon aholi dasturxonini ham shifobaxsh asal bilan toʻldirmoqda. Bugun Moʻminobod mahallasida yashovchi bu oilaning mirishkorligi koʻplarga maʼlum va manzur. Boshqalarga ibrat boʻlayotgan Sharipovlar xonadoni aʼzolari halol mehnati, topayotgan daromadlari yaxshi kunlariga buyursin.
Viloyat hokimligi matbuot xizmati