Jondor: nodir kitoblar, osori-atiqalarga boy xonadon moʻjazgina muzeyni eslatadi
2026-03-23 11:05:00 / Yangiliklar
Ana shunday ezgu maqsad yoʻlida oʻz hissasini qoʻshib kelayotgan fidoyi insonlardan biri Jondor tumanida istiqomat qiluvchi Barot Safarovdir. U koʻp yillardan buyon milliy asori atiqalar bilan bir qatorda, nodir kitoblarni toʻplash va ularni asrab-avaylash bilan shugʻullanib kelmoqda.
Barot Safarovning xonadoni goʻyo kichik muzeyni eslatadi. Bu yerda mingdan ziyod nodir asori atiqalar, tarixiy buyumlar hamda 10 mingdan ortiq kitoblar ehtiyotkorlik bilan saqlanadi. Ularning orasida qadimiy nashrlar, tarixiy manbalar, badiiy adabiyotlar va turli davrlarga oid qimmatli asarlar bor. Har bir buyum va har bir kitob oʻz tarixiga ega boʻlib, oʻtmishdan bugungi kunimizgacha boʻlgan yoʻl haqida hikoya qiladi.
Oʻz qiziqish va izlanishlari natijasi oʻlaroq, Barot Safarov bu boyliklarni shunchaki yigʻib qoʻyish bilan kifoyalanmaydi. U maktab oʻquvchilari, yoshlar bilan uchrashuvlar oʻtkazib, ularga tarixiy merosimizning ahamiyati, uni eʼzozlash va asrab-avaylash har bir fuqaroning muhim vazifasi ekanini tushuntirib keladi. Uning fikricha, tarixiy yodgorliklar va nodir kitoblar xalqning xotirasi, millatning oʻzligini anglashiga xizmat qiladigan bebaho manbalardir.
Darhaqiqat, tarixiy obidalar va madaniy meros obyektlarini asrash, ularni kelajak avlodlarga butun holda yetkazish bugungi kunning muhim vazifalaridan biridir. Bu boradagi targʻibot tadbirlari, shuningdek, Barot Safarov kabi tashabbuskor insonlarning saʼy-harakatlari fuqarolarda tarixiy merosimizga nisbatan hurmat va ehtirom tuygʻularini yanada mustahkamlashga xizmat qiladi.
Xulosa qilib aytganda, Barot Safarov singari insonlar bor ekan, milliy merosimiz hamisha eʼzozda boʻladi. Bu saʼy-harakat kelajak avlodlar uchun bebaho maʼnaviy xazinadir.
Viloyat hokimligi matbuot xizmati