Buxoro viloyati hokimligi

Jumladan, “Havzi nav” MFYda istiqomat qiluvchi Shoira Shodiyeva ayollar daftarining ishsizlik toifasiga kiritilgan boʻlib, “Monomarkaz” orqali pishiriqchilik kurslariga yoʻnaltirildi. Natijada u bankdan 17 million soʻm imtiyozli kredit mablagʻini olib, pishiriqchilik faoliyatini yoʻlga qoʻydi. Hozirda u nafaqat oʻzini daromad bilan taʼminlamoqda, balki “ustoz–shogird” anʼanasi asosida ikki nafar yoshni kasbga oʻrgatib, ularning bandligini taʼminlamoqda.  Hozirda uning oylik daromadi oʻrtacha 3 million soʻmni tashkil etmoqda.

Shuningdek, Charmgaron koʻchasida istiqomat qiluvchi Marjona Umarova ham 17 million soʻm imtiyozli kredit mablagʻi hisobidan koʻrpadoʻzlik faoliyatini boshlagan. U koʻrpa, koʻrpacha, yostiqlar hamda mato qirqimlaridan turli xil toʻshamalar tayyorlab, buyurtmalar asosida mahsulot tayyorlamoqda. Hozirda chevar ikki nafar shogirdi bilan birgalikda faoliyat yuritib, har oyda 4 million soʻm atrofida daromad topmoqda. 

Ahmad Borband koʻchasida istiqomat qiluvchi, 2-guruh nogironi boʻlishiga qaramasdan mehnatsevarligi va tashabbuskorligi bilan oʻz oʻrnini topgan Gulrux Komilova ham tadbirkorlik faoliyatini kengaytirmoqda. Ilgari pishiriqchilik bilan shugʻullanib kelgan Gulrux 15 million soʻm imtiyozli kredit sarmoyasini olib, yangi yoʻnalish — gips va shamlardan suvenir-sovgʻalar, gullar, oshxona idishlari hamda stol chiroqlari tayyorlashni yoʻlga qoʻydi. Bugunga kelib u uch nafar shogirdi bilan birga ishlab, oyiga oʻrtacha 5 million soʻm daromadga ega boʻlmoqda. 

Shu mahallada yashovchi Oliya Shukurova esa 100 million soʻm imtiyozli kredit mablagʻi asosida tikuvchilik faoliyatini rivojlantirmoqda. U milliy xalatlar, vishivkalar, patdoʻzlik buyumlari, sumkalar, yelpigʻichlar, soʻzani va aplikatsiya asosida kelin sarpolari tikishni yoʻlga qoʻygan. Kasb-kori tufayli hozirda 12 nafar ishsiz fuqaroning bandligini taʼminlamoqda. Qoʻli ostidagi chevarlar bilan uning har oyda mehnat qilib topayotgan daromadi 6 million soʻmdan kam emas. 

Bundan tashqari, Axmad Borband koʻchasida istiqomat qiluvchi Nargiza Bozorovaga subsidiya asosida zamonaviy tikuv mashinasi olib berilib, mahalla uning mustaqil faoliyat boshlashiga koʻmaklashdi. Bugunga kelib chevar ijara va sherikchilik asosida ish yuritib, bankning 33 million soʻm imtiyozli kredit mablagʻi orqali faoliyatini kengaytirmoqda. Sexda kyelin sarpolari, elita pardalar va milliy nimchalar tikish bilan shugʻullanayotgan tikuvchi yana 4 nafar shogirdini yoniga olib, tushayotgan buyurtmalarni tez, sifatli, bejirim tikib oʻz egalariga yetkazmoqda. 

Viloyat hokimligi matbuot xizmati