Buxoro viloyati hokimligi

Avvalgi “Mehribonlik uyi” oʻrnida qad rostlagan Abu Ali ibn Sino nomidagi ixtisoslashtirilgan maktab Buxoro filialini foydalanishga topshirish tadbirida viloyat hokimi Botir Zaripov ishtirok etdi. Viloyat rahbari yurtdoshlarimizni qoʻshaloq ayyom—muborak Ramazon hayiti va Navroʻz bayrami bilan samimiy qutlab, yosh avlod va ular ota-onalari, pedagogik jamoani yana bir koʻrkam ilm maskani ishga tushirilgani bilan muborakbod etdi.   

Eʼtirof qilinganidek, bu taʼlim maskani nafaqat zamonaviy bilimlar oʻchogʻi, balki buyuk tabib va mutafakkir ajdodimiz Ibn Sinoning boy ilmiy merosini yosh avlod qalbi va ongiga singdirishga xizmat qiladi. Bunda tahsil olayotgan oʻquvchilar chuqur bilim egallab, ilm-fanga boʻlgan qiziqishini oshiradi hamda kelajakda yurtimizning munosib vakillari boʻlib yetishadilar. Maktabni barpo etish, jihozlashda munosib hissa qoʻshgan tashkilotchilar, quruvchi-muhandislar, ustoz va murabbiylarga samimiy minnatdorlik bildirildi.   

Ramziy alvon lenta qirqilgach, tadbirda yigʻilgan viloyat mutasaddilari jamoatchilik vakillari, mehnat faxriylari bilan birgalikda taʼlim dargohida kelajagimiz egalari uchun yaratilgan shart-sharoit bilan tanishdilar.  

Abu Ali ibn Sino nomidagi ixtisoslashtirilgan maktab Buxoro filiali barcha talablarga javob beradigan infratuzilmaga ega boʻlib, uni barpo etish uchun umumiy qiymati 13,5 milliard soʻm mablagʻ sarflangan. Zamonaviy andozada, uch qavatdan iborat maktab 360 nafar oʻquvchiga moʻljallangan boʻlib, 120 oʻrinli yotoqxonasiga ham ega.  Dargohda 28 ta zamonaviy sinfxona, 3 ta fan laboratoriyasi, kutubxona, sport zali va boshqa zarur shart-sharoit yaratilgan.

Shuningdek, maktabda “Language Stars”, “Aniq hisob akademiyasi”, “Ijod va ilhom maktabi”, “Reaksiya va natija”, “Ilm va tabiat” kabi toʻgaraklar faoliyat yuritib, oʻquvchilarning intellektual salohiyatini rivojlantirishga xizmat qiladi. 

Quvonarlisi, endigina faoliyat boshlaganiga qaramasdan, taʼlim dargohi oʻz yosh isteʼdod sohiblariga ega. Hozirda ushbu taʼlim muassasasida 66 nafar oʻquvchi tabiiy fanlar yoʻnalishida tahsil olmoqda. Qisqa vaqt ichida ularning erishgan yutuqlari alohida eʼtiborga loyiq. 

Jumladan, STEM fanlari olimpiadasida 8-sinf oʻquvchisi Asila Nusratova va 7-sinf oʻquvchisi Farid Murotov 2-oʻrinni, Al-Xorazmiy nomidagi fan olimpiadasida esa Farid Murotov 2-oʻrinni, 7-sinf oʻquvchisi Laziza Yunusova 3-oʻrinni egallagani maktabda yoʻlga qoʻyilgan taʼlim sifati va oʻqituvchilarning yuqori salohiyatidan dalolatdir. 

Navqiron avlod ertasi va taʼlim-tarbiyasiga katta ishonch bildirgan viloyat rahbari va jamoatchilik vakillari ezgu niyatlar bilan maktab hovlisiga daraxt koʻchatlarini oʻtqazdilar. 

Viloyat hokimligi matbuot xizmati