Buxoro viloyati hokimligi

Mahallada ayni kunda aholining asosiy qismi dehqonchilik va chorvachilik bilan shugʻullanib, tirikchiligini oʻtkazmoqda. Oʻnlab xonadon tomorqa yerida issiqxona barpo qilib, yilnig toʻrt faslida avvalo, roʻzgʻor ehtiyoji uchun barakali hosil yetishtirayotgan boʻlsa, yana oʻnlab xonadon mehnatkashlari ogʻilxonasini obod qilib, qoramol, qoʻy-qoʻzi, tovuq boqib, choʻlquvarlar dasturxonini goʻsht, sut, sariyogʻ, tuxum kabi sara mahsulotlar bilan taʼminlamoqdalar.      

Bugun chorvachilikda katta tajribaga ega Rustam Muhammadiyev ham uy xoʻjaligida asosan boʻrdoqiga qoramol va qoʻy boqib, qut-barakaga erishmoqda. Hozirda uning ogʻilxonasida mahalliy “Qizil choʻl” va qisman “Angust” zotlariga mansub  50 boshdan oshiq qoramol, 100 boshdan ortiq qoʻy hamda bir necha bosh ot parvarish qilinmoqda. 

—Oilaviy faoliyatimizni dastlab 2 bosh qoramol bilan boshlagan boʻlsak, astoydil mehnatimiz, harakatimiz natijasida chorva molimiz sonini oshirishga erishdik,—deydi Rustam Muhammadiyev.—Hozirda sigir-buzoq, gʻunajinlarni kooperatsiya usulida aholiga tarqatishni yoʻlga qoʻygan boʻlsak, asosan boʻrdoqiga mol boqib, buqalarimizni 3-4 yoshligida goʻshtga topshirib, moddiy manfaatdorlikka erishmoqdamiz. Chorvachilikning oʻziga yarasha qiyinchiliklari bor, albatta. Ammo, peshona terimizga yarasha har oyda 1 tonna atrofida goʻsht yetishtirib, aholi dasturxoniga yetkazib, 100 million soʻmdan oshiq daromadni qoʻlga kiritmoqdamiz. Oila aʼzolarimiz shu ish bilan band. Koʻpdan kam boʻlganimiz yoʻq, mehnat qilib orzu-havasimizga yetayapmiz. 

Chorvador xonadon sohibi ayni kunda qoramollari parvarishi uchun ekin yerini kengaytirish, ozuqabop ekinlar va yem-xashak zahirasi uchun zamin yaratib, xoʻjaligida tuyoq sonini va albatta, moddiy manfaatdorlikni koʻpaytirish harakatida. 

Viloyat hokimligi matbuot xizmati