Jondor: koʻchat oʻtqazish, koʻkalamzorlashtirish har bir koʻcha va mahalla boʻylab davom etadi
2026-03-17 21:30:00 / Yangiliklar
Birgina Jondor davlat oʻrmon xoʻjaligi tasarrufidagi umumiy yer maydoni choʻl massivlaridagi yaylov bilan qoʻshganda, 86 ming gektardan ziyod boʻlib, shundan xoʻjalikning Ogʻar va Romitan boʻlimlaridagi 137 gektar sugʻoriladigan konturlarda mevali va manzarali daraxt koʻchatxonalari tashkil etilgan.
Xuddi shunday, xalq tabobati uchun dorivor oʻsimliklar, elimiz dasturxoni toʻkinligini taʼminlash uchun gʻalla va sabzavot-poliz mahsulotlari ekib yetishtirib kelinmoqda. Xoʻjalikning “Ogʻar” boʻlimi Manqufi aholi punktida ajratilgan 5 gektar maydonda tut koʻchatxonasini barpo qilish harakati bormoqda.
Ayni kunda Jondor koʻchatchilikka ixtisoslashgan davlat oʻrmon xoʻjaligi hududlarni koʻkalamzorlashtirish, “yashillashtirish”ga katta hissa qoʻshmoqda. Erta bahor kunlarida hududda keng koʻlamli koʻchat oʻtqazish va obodonlashtirish ishlari amalga oshirilmoqda. Bu xayrli tashabbus tuman markazidagi koʻchalar, Zarafshon, Qaroli, Xumin, Oxshix, Aleli, Poʻloti, Romish, Samonchiq mahallalari boʻylab davom ettirilmoqda.
Bu hududlarni koʻkalamzorlashtirish maqsadida 100 mingdan ortiq turli xil manzarali daraxt koʻchatlari yetkazib berilgan. Jumladan, katalpa, shumtol, qayragʻoch, tut hamda boshqa manzarali daraxt koʻchatlari mahallalar, obodonlashtirish boʻlimlari, fermer xoʻjaliklari, tibbiyot muassasalari va taʼlim maskanlariga tarqatilgan.
Koʻchatchilikka ixtisoslashgan davlat oʻrmon xoʻjaligi mutaxassislari taʼkidlashicha, koʻchatlarni yetishtirishda zamonaviy agrotexnologiyalar qoʻllanilib, iqlim sharoitiga mos va sifatli boʻlishiga alohida eʼtibor qaratilmoqda. Bu esa ekilgan daraxtlarning tez moslashib, barqaror oʻsishini taʼminlaydi. Hashar doirasidagi bunday keng koʻlamli koʻkalamzorlashtirish ishlari nafaqat hududning ekologik muvozanatini mustahkamlaydi, balki aholi orasida tabiatga mehr, atrof-muhitga eʼtibor va masʼuliyat hissini ham yanada oshiradi.
Viloyat hokimligi matbuot xizmati