Buxoro viloyati hokimligi

Delegatsiya aʼzolari safar davomida “Chungvoon University” rahbariyati bilan avval tor doirada, keyinchalik kengaytirilgan tartibda uchrashuvlar oʻtkazdilar. Keyingi manzil delegatsiya aʼzolari Janubiy Koreyaning qadoqlash sanoatida faoliyat yurituvchi “JU Young Packaging Solution Co., Ltd.” Korxonasida boʻlishib, zavoddagi ishlab chiqarish jarayoni bilan yaqindan tanishdilar.

Shuningdek, zamonaviy tibbiy texnologiyalar ishlab chiqishga ixtisoslashgan “MVITRO Co., Ltd.” kompaniyasi faoliyati, ilmiy-tadqiqot ishlari va ishlab chiqarish jarayoni oʻrganildi. Janubiy Koreyada joylashgan “Konyang University” universitetida boʻlgan qorakoʻllik masʼullar xorij tibbiyoti va sogʻliqni saqlash yoʻnalishida hamkorlikni rivojlantirishga qaratilgan muhim muzokaralarni oʻtkazdilar. 

“Chungvoon University” va “Konyang University” kabi oliy taʼlim dargohlari koʻp yillik faoliyatga ega boʻlib, axborot texnologiyalari, muhandislik, media va xizmat koʻrsatish, shuningdek, zamonaviy tibbiyot markazlari va klinikalari, ilgʻor davolash usullari hamda yuqori malakali mutaxassislari bilan tanilgan. 

Muzokaralarda taʼlim, kadrlar tayyorlash hamda zamonaviy bilim va tajribalarni almashish masalalari muhokama qilindi. Axborot texnologiyalari yoʻnalishida tumandagi “Acharya University” bilan hamkorlikni yoʻlga qoʻyish, Qorakoʻlda xorijiy universitet vakillik markazini ochish boʻyicha kelishuvga erishildi. 

Xuddi shunday, “Konyang University” qoshida faoliyat yuritayotgan zamonaviy klinikalarda qoʻllanilayotgan davolash texnologiyalari va innovatsion yondashuvlarni Qorakoʻl tibbiyotida joriy qilish yuzasidan bitimga kelindi. Unga koʻra, koreyalik malakali mutaxassislar Abu Ali ibn Sino nomidagi Qorakoʻl tibbiyot texnikumida faoliyat boshlashi rejalashtirildi. 

Ishlab chiqarish va investitsiya salohiyatiga kelsak, Koreya kompaniyalari Qorakoʻlda faoliyat boshlagan taqdirda, ularga qator muhim imtiyozlar taqdim etilishi alohida qayd etildi. Jumladan, investitsiya hajmiga qarab 3 yildan 10 yilgacha soliq imtiyozlari, ishlab chiqarish uchun olib kiriladigan uskunalar va xomashyo uchun bojxona toʻlovlaridan ozod etish, energiya resurslari bilan barqaror taʼminlash, Markaziy Osiyo bozorlariga chiqish uchun qulay logistika imkoniyatlari.

Shu bois, Janubiy Koreyaning qadoqlash sanoatida faoliyat yurituvchi “JU Young Packaging Solution Co., Ltd.” korxonasi zamonaviy texnologiyalar asosida qogʻoz va karton qadoqlash mahsulotlarini ishlab chiqarish hamda ularga turli brend va kompaniyalarning logotiplarini yuqori sifatda bosib berish bilan shugʻullanadi. Korxonada mahsulotlar tayyorlash jarayoni toʻliq avtomatlashtirilgan boʻlib, xomashyoni qayta ishlashdan tortib, tayyor mahsulotni qadoqlashgacha boʻlgan barcha bosqich zamonaviy uskunalar yordamida amalga oshiriladi. 

Korxona mutasaddilari bilan muloqotda zamonaviy qadoqlash sanoati, ekologik toza xomashyo asosida mahsulot ishlab chiqarish hamda xalqaro bozor talablariga mos mahsulot tayyorlash tajribasini oʻzlashtirish, shunday zamonaviy korxonani Qorakoʻlda ham tashkil etish imkoniyatlari koʻrib chiqildi. 

Viloyat hokimligi matbuot xizmati