Buxoro tumani: “NASA Academy” oʻquv markazi — yoshlar uchun yangi imkoniyat
2026-03-17 10:30:00 / Yangiliklar
Bugun navqiron avlod orasidan ilm-fanda iqtidor egalari, yosh isteʼdodlar yetishib chiqayotgani quvonarli, albatta. “Rabotiqalmoq” mahalla fuqarolar yigʻinida yashovchi Doston Nabotov tomonidan yoshlar taʼlimini rivojlantirishga qaratilgan muhim loyiha amalga oshirildi. U Yoshlar ishlari agentligi tomonidan yoʻlga qoʻyilgan “Koʻmak” loyihasi doirasida ajratilgan 130 million soʻm ssuda mablagʻi evaziga mahallada “NASA Academy” oʻquv markazi faoliyatini yoʻlga qoʻydi.
Mazkur oʻquv markazi ingliz tilidan IELTS, CEFR va SAT xalqaro imtihonlariga tayyorlov kurslari hamda zamonaviy axborot texnologiyalari IT yoʻnalishida zamonaviy bilim berishga moʻljallangan boʻlib, mahalla yoshlariga yangi imkoniyatlar yaratib bermoqda. Tashabbuskor Doston Nabotovning taʼkidlashicha, bu oʻquv markazini ochishdan asosiy maqsad mahallada ilm olishga intiluvchan yoshlarni qoʻllab-quvvatlash, ular isteʼdodini yuzaga chiqarishga koʻmaklashishdir.
—Oʻsib kelayotgan yigit-qizlar uchun bugun chet tillari va zamonaviy texnologiyalarini puxta oʻrganish juda muhim. Biz ochgan oʻquv markazi orqali mahallamiz yoshlariga sifatli taʼlim berish, ularni xalqaro imtihonlarga tayyorlash va kelajakda yuqori natijalarga erishishlariga yordam berishni maqsad qilganmiz, — deydi D. Nabotov.
Shuningdek, markazda yoshlarning talab darajasida bilim olishlari uchun zarur shart-sharoit yaratilgan boʻlib, darslar yuqori malakali oʻqituvchilar tomonidan olib borilmoqda. Muhimi, “NASA Academy” oʻquv markazi mahalla yoshlarining puxta bilim olib, kelgusida raqobatbardosh mutaxassis boʻlib yetishishida hissa qoʻshadi.
Viloyat hokimligi matbuot xizmati