Qorakoʻl: “Temirni qizigʻida bosayotgan” ustaning qoʻli dard koʻrmasin
2026-03-17 10:25:00 / Yangiliklar
Erta bahor qoʻli qadoq dehqon, mirishkor tomorqachi uchun qizgʻin ish fasli. Bu faslda ayniqsa, dehqonga yaqin hamkor—temirchi ustaning qoʻli-qoʻliga tegmaydi. “Ish quroling soz boʻlsa, mashaqqating oz boʻlar” deganlaridek, dehqon hamda tomorqachining mehnat quroli, ketmon-belkurak, oʻrogʻini sozlab, damini qilichdek keskir charxlab beruvchi usta temirchilardir.
Qorakoʻl tumani “Xoʻjakon” mahalla fuqarolar yigʻinida ham ayni kunda 1700 dan ortiq xonadon boʻlib, dala-dehqonchilik ishlari keng quloch yoygan. Kasb-kori oilaviy temirchilik sulolasi davomchisi boʻlgan Ibrohim Hayitov uchun esa erta bahor qizgʻin ish mavsumi.
Ibrohim qishloqda usta temirchi boʻlib tanilganiga koʻp yil boʻlgan. U Xoʻjakonda yashash uyi yonidagi moʻjaz ustaxonada erta tongdan kechga qadar sangdonda ish bilan mashgʻulligini koʻrasiz. Taʼbir joiz boʻlsa, usta qoʻlida poʻlat temir ham nafis gulday toblanib, tigʻi charxlangan mehnat vositasiga aylanadi. Qoʻni-qoʻshni, mahalladoshlari qoʻlida dami qaytgan, yaroqsiz ketmon, oʻroq yoki belkurakni koʻrgan ustaning taʼbir xira tortishi aniq. Darhol ishga tushib, oʻz mahoratini namoyon etib, temirni “yarqiratish”ga oʻrgangan. Shu bois, ustaxonasi mijozlar bilan gavjum.
Ayni kunda Ibrohim Hayitov nafaqat talabgir ketmon, belkurak, oʻroq yoki oshpichoq, balki kapgir, tokqaychi, pichoq, xanjar kabi turli buyumlarni yasab, koʻplarni xursand qilib, mehnatiga yarasha daromad topib kelmoqda. Usta yaratgan har bir buyum puxta ishlangani va sifatli bilan ajralib turadi.
— Esimni tanibmanki, otamning etagidan tutib kam boʻlmadim, temirchi boʻlib, elga tanilganim, shu kasb-korim ortidan oila boqib, halol mehnat bilan izzat-hurmat qozonayotganimdan mamnunman,—deydi usta temirchi Ibrohim hayitov.— Qishloq joyida ish qurollarisiz yashash juda qiyin. Masalan, erta bahorda ekin-tikin mavsumi boshlanishi bilan ketmon va belkurakka talab oshadi, keyinroq oʻroqqa buyurtma keskin koʻpayadi. Sangdonda choʻgʻday qizigan temir bilan ishlash menga zavq bagʻishlaydi. Har safar bolgʻa urilganda jaranglagan temir tovushi menga otamni eslatadi.
Zamon shiddat bilan oʻzgarayotgan boʻlsada, milliy va qadimiy hunarlarni asrab-avaylab, ularni yanada mukammallashtirib kelayotgan bunday ustalar jamiyatimizda alohida eʼtirofga loyiq. “Temirni qizigʻida bosib”, halol mehnati bilan el xizmatida boʻlayotgan temirchilarimizning qoʻli dard koʻrmasin.
Viloyat hokimligi matbuot xizmati