Kogon: Joʻrayevlar uy xoʻjaligida tomorqadan yilda uch marta hosil olinmoqda
2026-03-16 08:55:00 / Yangiliklar
Mahallada asosiy tirikchilik manbai tomorqa, issiqxona xoʻjaligi, chorvachilik va parrandachilik tarmoqlaridir. Qolaversa, hududda savdo va xizmat koʻrsatish tarmogʻi bilan birga qurilish materiallari, bugʻdoyni qayta ishlash korxonalari, novvoyxona, tikuvchilik va boshqa sexlar ishi kengaymoqda.
Shu mahallada istiqomat qiluvchi Bahodir Joʻrayev ham tomorqa yeridan unumli foydalanib kelayotgan tajribali dehqonlardan. Oʻziga xos uslubi, koʻp yillik tajribasiga muvofiq u ilgʻor agrotexnik usullarni qoʻllab, ixcham yerdan moʻl va barakali hosil olish mumkinligini amalda koʻrsatmoqda.
Bahodir Joʻrayev oʻz xonadonidagi tomorqada almashlab ekishni afzal biladi. Bu oddiy uslub moʻl hosil garovi. Hozirda u hovlisi etagidagi ekin yerini 5 sotix qismida issiqxona tashkil etgani holda bu yerda erta bahor aholi xonadonlari uchun iqlim sharoitiga mos, serhosil pomidor navlaridan 1500 tup koʻchat parvarish qilmoqda. Issiqxona sharoitida yetishtirilayotgan pomidor koʻchatlari doimiy agrotexnik parvarishni—sugʻorish, oziqlantirish, kasallik va zararkunandalarga qarshi kurashishni taqozo etadi.
Joʻrayev oila aʼzolari taʼkidlashicha, parvarishi, agrotexnik ishlari talab darajasida bajarilsa, har bir tup pomidor koʻchatidan 4-6 kilogramgacha hosil olish mumkin. Qolaversa, dehqonchilik mavsumida bulgʻor qalampiri, bodring, baqlajon va boshqa sabzavot mahsulotlari koʻchatlari, shuningdek, ismaloq, sarimsoqpiyoz, koʻkpiyoz, kashnich, shivit, rediska kabilarni yetishtirib, roʻzgʻor ehtiyoji uchun muayyan daromadga ega boʻlish barobarida qishloqdoshlar dasturxoniga ham tortiq qilinmoqda.
—Oilamiz bilan ekin yerida ishlab, bir yilda oʻrtacha 60 million soʻm moddiy manfaatdorlikka erishsak, sabzavot mahsulotlari pishiqchiligi, hosil yigʻib-terib olinadigan oylarda bozordan xarid qilishimizga hojat qolmaydi,—deydi xonadon sohibi Bahodir Joʻrayev.—Issiqxona bizga qishki mavsumda ham ermak, daromad manbaiga aylangan. Yer chopish, urugʻ sepib, nihol parvarishlash, atrofdagi aholi xonadonlariga koʻchat yetkazish hayotimizning bir qismiga aylangan. Qolaversa, qishloqda koʻplar qatorida mol-holimiz, sigir-buzogʻimiz, parvarishlayotgan tovuqlarimizga ham egamiz. Shundan xonadonimiz turmush sharoitini ham yaxshilashga erishmoqdamiz.
Viloyat hokimligi matbuot xizmati