“Ehtirom va e’tirof 70+”: buxorolik bir guruh ustoz jurnalistlar sharaflandi
2026-03-14 14:55:00 / Yangiliklar
“Ehtirom va e’tirof”— bu 70 yoshdan oshgan 12 nafar ustoz jurnalist bir davrada jam bo‘lishgani, ustozlar tajribasi, bugungi avlodning faxriy jurnalistlar bilan diydorlashuvi, Buxoro matbuoti tarixining tirik hikoyasi va avlodlar o‘rtasidagi ma’naviy ko‘prik, ta’bir joiz bo‘lsa, “Vaqt zanjiri”dir.
Ustozlar yubiley tadbirini O‘zbekiston Respublikasida xizmat ko‘rsatgan artist Yo‘ldosh Genjayev tabrik so‘zi bilan ochib, Buxoro matbuoti va radiotelevideniye sohasida ibratli faoliyat davrini o‘tagan ustoz jurnalistlar Shavkat Asadov, Izzatullo Hojiyev, Hadicha Ramazonova, Zuhra Qurbonova, Sulaymon Shodiyev, Komil Jo‘rayev, Muxtor Abdullayev, Oliya Ostonova, Svetlana Axmedova, Olima Mirzayeva, Sora Tosheva, Asxor Istamovlarni sahnaga chorladi.
Viloyat hokimi Botir Zaripovning faxriy jurnalistlarga yo‘llagan tabrigini viloyat hokimining maslahatchisi Akbar Rustamov tadbir qatnashchilariga o‘qib eshittirdi.
O‘zbekiston Yozuvchilar uyushmasi viloyat bo‘limi raisi, “Buxoronoma” va “Buxarskiy vestnik” gazetalari bosh muharriri Shodmon Sulaymonov, “Buxoro viloyat teleradiokanali” DM direktori Obid Shabanov, respublika Jurnalistlar uyushmasi viloyat bo‘limi rahbari Gulshoda Ibrohimova, shuningdek, Buxoro davlat universiteti rektori, professor Obidjon Hamidovlar ustoz jurnalistlarni muborak yoshlari, erishgan muvaffaqiyatlari bilan samimiy muborakbod etishib, ularning bosib o‘tgan qizg‘in va namunali hayot yo‘llariga e’tibor qaratdilar.
O‘z navbatida, Yangi O‘zbekistonda yuz berayotgan o‘zgarish va yangilanishlar mazmun-mohiyatini xalqimizga tezkor, xolis yetkazish, ajdodlarimizning boqiy an’analari va milliy qadriyatlarini asrab-avaylashni targ‘ib etishda bugun soha xodimlari aynan ustoz jurnalistlardan o‘rganishi zarurligini ta’kidladilar.
Yurtimizdagi ommaviy axborot vositalari, bosma nashrlar safida viloyat teleradiokompaniyasi hamda otaxon nashr, chop etila boshlanganiga bir asrdan oshgan “Buxoronoma” va “Buxarskiy vestnik” gazetalari ham mustaqillik g‘oyalari, milliy qadriyatlarni keng targ‘ib qilish, odamlarda, ayniqsa, yosh avlodda yurt kelajagiga daxldorlik va mas’ullik tuyg‘usini barqaror etishga, jonajon O‘zbekistonimizning gullab-yashnashini yurtdoshlarimiz ongidagi o‘zgarishlar bilan uyg‘un holda ifodalashda salmoqli yutuqlarga erishdilar. Bugungi shiddatkor davr, globallashuv davri jurnalistlar zimmasiga ham nihoyatda zalvorli talablarni qo‘ymoqdaki, bunda ustoz jurnalistlar ish uslubi, kasbiga sadoqati, ishga yondashuvi yoshlar uchun ibrat mayog‘idir.
Yubiley tadbirida ehtirom va e’tirofga sazovor bo‘lgan nuroniy faxriylar hamkasb izdoshlari, yoshlarga qizg‘in va sarguzashtlarga boy faoliyatlari haqida boy xotiralari bilan o‘rtoqlashib, tashkilotchilarga minnatdorliklarini izhor qildilar.
Tadbirda O‘zbekiston davlat filarmoniyasi viloyat hududiy bo‘linmasi xushovoz xonandalari tomonidan ijro etilgan taronalar barchaga manzur bo‘ldi.
Viloyat hokimligi matbuot xizmati