Buxoro viloyati hokimligi

Xoʻjakon mahallasida yashovchi Ilyos Qurbonov koʻp yillardan buyon qoʻychilik bilan shugʻullanib kelayotgan mirishkor chorvadorlardan biri. U mayda shoxli chorva mollari parvarishiga alohida eʼtibor qaratib, xoʻjaligida tuyoq sonini koʻpaytirib, shuning ortidan nafaqat oʻzi va oilasi, balki qishloqdoshlarini ham moddiy manfaatdor qilib, mehnatsevarligi bilan mahalla ahli orasida hurmat qozongan.

Bugunga kelib Ilyos Qurbonovning qoʻrasida parvarish qilinayotgan jaydari zotli qoʻy va qoʻchqorlari soni 400 boshga yetkazilgan boʻlib, umumiy moddiy qiymati, yaʼni bozor narxi qariyb 1,2 milliard soʻmni tashkil etmoqda. Bunda chorva mollari uchun zarur shart-sharoit hozirlangan boʻlib, ozuqa zaxirasi, veterinariya nazorati hamda toza va ozoda ogʻilxona ularning sogʻlom oʻsib-ulgʻayishida muhim omil boʻlib xizmat qilmoqda. Ayniqsa, naslli qoʻchqorlarni koʻpaytirish va mahsuldorlikni oshirish borasida olib borilayotgan ishlar eʼtiborga molik.

Xoʻjalik rahbari Ilyos Qurbonov kelgusida faoliyatini yanada kengaytirish, qishlov uchun ozuqabop mahsulotlar zahirasini tayyorlashda ekin yeriga ehtiyoji borligi, davlat dasturlari doirasida bank imtiyozli kredit mablagʻi va subsidiya olishda amaliy yordamga muhtojligini bildirgan. Aytish joizki, u singari  mehnatkash chorvadorlarning saʼy-harakati tufayli hududda chorva tarmogʻi izchil rivojlanib, goʻsht va jun mahsulotlari yetishtirish hajmi tobora oshirilmoqda. 

Maʼlumotlarga binoan, ayni kunda tumanda qoramol soni 179,4 ming boshga yetkazilgan boʻlib, shundan sogʻin sigirlar 81,2 ming boshga, qoʻy va echkilar 302,4 ming boshga koʻpaytirishga erishilgan. Hududda goʻsht ishlab chikarish hajmi 29,6 ming tonnaga, sut ishlab chiqarish hajmi 125,6 ming tonnaga oʻsgani katta yutuq, albatta. Birgina oʻtgan yilda mahalliy chorvador, tadbirkor-fermerlar tomonidan chet ellardan jami 290 bosh naslli qoramol olib kelinib, parvarishlanayotgani ham goʻsht va sut yetishtirishda salmoqli natijalarga sabab boʻlmoqda.

Viloyat hokimligi matbuot xizmati