Qorovulbozor: “Navbahor” mahallasidagi 5 gektarli issiqxonada sarimsoqpiyoz yetishtirilmoqda
2026-03-12 15:45:00 / Yangiliklar
Soʻnggi yillarda Qorovulbozor tumanida yirik zamonaviy issiqxona majmuasini tashkil qilish maqsadida har biri 0,5 gektardan iborat 76 ta issiqxona loyihasi roʻyobga chiqarilmoqda. Viloyat va tuman hokimliklari, “Turonbank” ATB Buxoro filiali bilan hamkorlikda choʻlquvarlar zaminida aniqlangan 76 nafar tashabbuskorga alohida yer maydoni ajratib berilgan. Oʻtgan oylarda ularda qurilish, jihozlash ishlari olib borilib, qishloq xoʻjaligi mahsulotlari ekib yetishtirish ishlari izchil davom ettirilmoqda.
Xuddi shunday, hududda 14 gektar issiqxona yer maydoni 35 nafar tashabbuskorga jami 21 milliard soʻm miqdorida imtiyozli kredit mablagʻi asosida ajratib berilgan. Bu issiqxonalar majmuasining ishga tushirilishi 380 ta doimiy va 760 ta mavsumiy ish oʻrni yaratish imkonini bermoqda. Bu loyihada 400 nafar yoshni ish bilan taʼminlash koʻzda tutilgan.
Aholi turmush darajasini oshirish va kambagʻallikni qisqartirish maqsadida “Turonbank” kabi moliyaviy institutlar hududda faqat kreditlash emas, balki mahallabay yondashuv, ijtimoiy tashabbuslar va ish oʻrinlari yaratishga yoʻnaltirilgan loyihalar bilan faol ishtirok etmoqda. Shunday loyihalardan biri Navbahor mahallasida tashkil qilingan 5 gektardan iborat issiqxonada amalga oshirilmoqda.
Ayni kunda mazkur issiqxona yerida sarimsoqpiyoz ekib yetishtirilayotgan boʻlib, bundan hademay 30 tonnadon ortiq hosil olish koʻzlangan. Bundan tashqari, issiqxonaning 2 gektar maydonida ismaloq yetishtirilib, bozor rastalariga chiqarilmoqda. Yana ekin yerining 1 gektar qismida kartoshka hamda 10 gektar ochiq yerda qovun-tarvuz yetishtirishga puxta tayyorgarlik koʻrilmoqda.
Birgina issiqxona tufayli bugun bu yerda 6 nafar doimiy va 40 nafarga yaqin mavsumiy ish oʻrinlari yaratilib, aholi daromadini oshirish choralari koʻrilmoqda. Albatta, bu saʼy-harakat hududda oziq-ovqat xavfsizligini taʼminlash, aholi bandligini taʼminlashda muhim ahamiyatga ega.
Viloyat hokimligi matbuot xizmati